ରାଇରଙ୍ଗପୁର: ମଣିଷ ଯେ ଏତେ କ୍ରୂର ହୋଇପାରେ ତାହା 8 ବର୍ଷର ନାବାଳକ ହତ୍ୟା ଘଟଣାରୁ ସ୍ପଷ୍ଟ ବାରି ହେଉଛି । ସାମାନ୍ୟ ବିଲାତି ଓ ଶାଗ ପାଇଁ ଜଣେ ନାବାଳକକୁ ନିର୍ମମ ଭାବେ ହତ୍ୟା କରିଥିବା ଘଟଣା ସାମ୍ନାକୁ ଆସିଛି। ପରିବା ବାଡିରେ ଛେଳି ପଶି ବିଲାତି ଓ ଶାଗ ଖାଇଦେବାରୁ ହତ୍ୟା କରିଥିବା ସ୍ବୀକାର କରିଛି ହତ୍ୟାକାରୀ ଲାଲ ମୋହନ ତିରିଆ।
ସାମାନ୍ୟ ପରିବା ଚାଷ ନଷ୍ଟ ଯୋଗୁଁ ଜଣେ ନାବାଳକକୁ ନିର୍ମମ ଭାବେ ହତ୍ୟା କଲା ଜମି ମାଲିକ
ସୂଚନାନୁସାରେ, ଗତ ରବିବାର 8 ବର୍ଷର ନାବାଳକ ଦଶରଥ ହେମ୍ବ୍ରମଙ୍କ କ୍ଷତାକ୍ତ ମୃତଦେହ ମୟୂରଭଞ୍ଜ ବାଦାମପାହାଡ ଥାନା ଅନ୍ତର୍ଗତ ବାସାଘୁଟୁ ଓ ତୁଣ୍ଟିପାଣି ଗାଁ ସୀମାରେ ଥିବା ରାସ୍ତା କଡରେ ପଡ଼ିଥିଲା। ମୃତ ନାବାଳକ ଜଣକ ଶନିବାର ଗାଁ ପିଲାଙ୍କ ସହ ଛେଳି ଚରାଇବାକୁ ଯାଇ ଆଉ ଘରକୁ ଫେରି ନଥିଲେ। ତେବେ ପରିବାର ଲୋକେ ଖୋଜାଖୋଜି କରି ରବିବାର ପୂର୍ବାହ୍ନ ସମୟରେ ରାସ୍ତା କଡରୁ ନାବାଳକଙ୍କ କ୍ଷତାକ୍ତ ମୃତଦେହ ଦେଖି ବାଦାମପାହାଡ ଥାନା ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଛାନଭିନ ଆରମ୍ଭ କରିଥିଲା।