ମାଲକାନଗିରି: ଆଧୁନିକ ସମାଜରେ ଆଜି ବି କାୟା ବିସ୍ତାର କରୁଛି ଗୁଣିଗାରେଡି । ଏବେ ବି ଗୁଣିଗାରେଡି ସନ୍ଦେହରେ ଆଜି ବି ଲୋକଙ୍କ ହତ୍ୟା ମାମଲା କିଛି ନୁହେଁ । ଯାହାର ଏକ ଜ୍ବଳନ୍ତ ଉଦାହରଣ ଦେଖିବାକୁ ମିଳିଛି ମାଲକାନଗିରି ଜିଲ୍ଲା ଓର୍କେଲ ଥାନା ଅନ୍ତର୍ଗତ ତାରଲାକଟା ଗାଁରେ । ଗୁଣି ଗାରେଡି ସନ୍ଦେହରେ ଗାଁର ସୁବାସ ଭୂୟାଁଙ୍କ ହତ୍ୟା କରାଯାଇଥିବା ବେଳେ ଅଭିଯୁକ୍ତ ବଜକୁ ପୋଲିସ ଗିରଫ କରିଛି ।
ସୂଚନା ଅନୁଯାୟୀ ବୁଧବାର ବିଳମ୍ବିତ ରାତିରେ ଅଭିଯୁକ୍ତ ବଜ, ସୁବାସଙ୍କ ଘରକୁ ଯାଇଥିଲେ । ସେଠାରେ ସେ ସୁବାସ ଓ ତାଙ୍କ ପତ୍ନୀ ଲକ୍ଷ୍ମୀଙ୍କ ଉପରେ ଲାଠି ମାଡ କରିବା ସହ ଧନୁ ତୀରରେ ଆକ୍ରମଣ କରିଥିଲା । ଆକ୍ରମଣ ପରେ ଅଭିଯୁକ୍ତ ଘଟଣାସ୍ଥଳରୁ ଚାଲିଯାଇଥିବା ବେଳେ କ୍ଷତାକ୍ତ ସୁବାସ ଓ ଲକ୍ଷ୍ମୀଙ୍କୁ ସ୍ଥାନୀୟ ଲୋକେ ଉଦ୍ଧାର କରି ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ସୁବାସଙ୍କ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହୋଇପଡିବାରୁ ତାଙ୍କୁ ତୁରନ୍ତ ମାଲକାନଗିରି ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା ।