ମାଲକାନଗିରି: ଜିଲ୍ଲାର ମାଥିଲି ଥାନା ଅନ୍ତର୍ଗତ ମାଓଦୁର୍ଗ ତୁଳସୀ ଘାଟିରେ ସ୍ବାସ୍ଥ୍ୟ କ୍ୟାମ୍ପ ବସାଇ ସଫଳ ଭାବରେ ଫେରିଛନ୍ତି ମାଥିଲି ସବଡିଭିଜନ ସ୍ବାସ୍ଥ୍ୟ ଟିମ୍ । ଏହି ଅଞ୍ଚଳ ଲାଲ କରିଡରଙ୍କ ଆଡ୍ଡାସ୍ଥଳୀ ହୋଇଥିବାରୁ ପ୍ରଶାସନ ଯାଇପାରୁନଥିବା ବେଳେ ସ୍ବାସ୍ଥ୍ୟକର୍ମୀ କ୍ୟାମ୍ପ କରି ଫେରିଥିବା କହିଛନ୍ତି । ସେପଟେ ସ୍ବାସ୍ଥ୍ୟସେବା ଭଳି ଅନ୍ୟାନ୍ୟ ସେବା ଯୋଗାଇବା ପାଇଁ ଘାଟି ବାସିନ୍ଦା ଦାବି କରିଛନ୍ତି ।
ମାଥିଲିର ଭାରପ୍ରାପ୍ତ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡ଼ଃ. ଅମୀୟ ସ୍ବାଇଁଙ୍କ ନେତୃତ୍ବରେ ଗଠନ ହୋଇଥିବା ୧୫ ଜଣିଆ ସ୍ବାସ୍ଥ୍ୟ ଟିମ୍ ତୁଳସୀ ପାହାଡରେ ପାଦ ଥାପିଥିଲେ । ଗାଁର ଲୋକଙ୍କୁ ସ୍ବାସ୍ଥ୍ୟ ଯୋଗାଇ ସଫଳତାର ସହିତ ଏହି ଟିମ୍ ସେଠାରୁ ଫେରିଛନ୍ତି । ତୁଳସୀ ପାହାଡ଼ରେ ଥିବା ଗ୍ରାମଗୁଡିକ ଏକ ମ୍ୟାଲେରିଆ ପ୍ରବଣ ଅଞ୍ଚଳ ହୋଇଥିବାରୁ ଲୋକଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖି ସ୍ବାସ୍ଥ୍ୟ ବିଭାଗ ତରଫରୁ ଏହି କ୍ୟାମ୍ପ ଆୟୋଜନ ହୋଇଥିଲା । ତେବେ ଲାଲଗଡ଼ର ଏହି ସ୍ବାସ୍ଥ୍ୟ କ୍ୟାମ୍ପକୁ ନେଇ ଡାକ୍ତରମାନଙ୍କୁ ତୁଳସୀ ଅଞ୍ଚଳବାସୀ ପ୍ରଶଂସା କରିଛନ୍ତି ।