ଧାନ ମଣ୍ଡି ଅବ୍ୟବସ୍ଥାକୁ ନେଇ ମାଲକାନଗିରି କୃଷକ ମହାସଂଘର ବନ୍ଦ ପାଳନ

12:12 February 08

ଧାନ ମଣ୍ଡି ଅବ୍ୟବସ୍ଥାକୁ ନେଇ ମାଲକାନଗିରି କୃଷକ ମହାସଂଘର ବନ୍ଦ ପାଳନ

ମାଲକାନଗିରି: ଧାନ ମଣ୍ଡିର ଅବ୍ୟବସ୍ଥାକୁ ନେଇ ମାଲକାନଗିରି ସହରରେ ସମସ୍ତ ରାସ୍ତା ବନ୍ଦ କଲା କୃଷକ ମହାସଂଘ । ମାଲକାନଗିରି ଜିଲ୍ଲାରେ ଧାନର ଅଭାବି ବିକ୍ରିକୁ ନେଇ କୃଷକ ମହାସଂଘ ସହ ଜିଲ୍ଲା ବିଜେପି ପକ୍ଷରୁ ଶନିବାର ରାସ୍ତାରୋକ କରାଯାଇଛି । ଏଥିରେ ଶତାଧିକ ଚାଷୀଙ୍କ ସହ ବିଜେପି କର୍ମୀମାନେ ଜିଲ୍ଲା ସଦର ଠାରେ ପହଞ୍ଚି ଡି.ଏନ.କେ ଛକରେ ରାସ୍ତା ଅବରୋଧ କରିଛନ୍ତି । ରାସ୍ତା ଅବରୋଧ କାରଣରୁ ଗାଡି ମୋଟର ବନ୍ଦ ରହିଛି ।

ବିଶେଷ କରି ମଣ୍ଡି ଆରମ୍ଭ ହୋଇ ତିନି ମାସ ବିତି ଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ମାଲକାନଗିରି ଜିଲ୍ଲାର ଅଧିକାଂଶ ଚାଷୀଙ୍କୁ ଧାନ ବିକ୍ରି କରିବା ଲାଗି ସରକାରଙ୍କ ଟୋକେନ ମିଳିନାହିଁ । ଯେଉଁମାନଙ୍କୁ ଟୋକେନ ମିଳିଛି ସେମାନଙ୍କ ଠାରୁ ମିଲର ମାନେ ବସ୍ତା ପିଚ୍ଛା ୫ କେଜି ଧାନ କାଟୁଥିବା ମଧ୍ୟ ଅଭିଯୋଗ ହୋଇଛି ।

 ଚାଷୀଙ୍କ ବିଭିନ୍ନ ସମସ୍ୟାକୁ ନେଇ ବାରମ୍ବାର ଜିଲ୍ଲା ପ୍ରଶାସନକୁ ଅବଗତ କରାଯାଇଥିଲେ ସୁଦ୍ଧା ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବାରୁ ଚାଷୀମାନେ ଶନିବାର ବାଧ୍ୟ ହୋଇ  ରାଜରାସ୍ତାକୁ ଓଲହ୍ଲାଇଛନ୍ତି । ତେବେ ଚାଷୀମାନେ ମୁଖ୍ୟ ରାସ୍ତା ଉପରେ ଧାନ ବସ୍ତା ରଖି ରାସ୍ତା ଅବରୋଧ କରିଛନ୍ତି ।

 ଫଳରେ ମାଲକାନଗିରି-ଜୟପୁର, ମାଲକାନଗିରି-ରାୟପୁର, ମାଲକାନଗିରି-ହାଇଦ୍ରାବାଦ ମଧ୍ୟରେ ଯାଉଥିବା ଯାନବାହନ ଚଳାଚଳ ବନ୍ଦ ରହିଛି । ପୋଲିସ ଓ ଯୋଗାଣ ଅଧିକାରୀ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଛନ୍ତି । ହେଲେ ଚାଷୀଙ୍କ ଧାନ କିଣା ନଯିବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଉଭୟ ବି.ଜେ.ପି ଓ କୃଷକ ସମାଜ ପକ୍ଷରୁ କୁହାଯାଇଛି ।

ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ