ମାଲକାନଗିରି: ଦିନକୁ ଦିନ ରାଜ୍ୟରେ ବ୍ୟାପୁଛି କିଡନୀ ରୋଗୀଙ୍କ ସଂଖ୍ୟା । ଯାହାର ଚିକିତ୍ସା ପାଇଁ ଦରକାର ଲକ୍ଷାଧିକ ଟଙ୍କା । କିନ୍ତୁ ଏଠି ଘରୋଇ ଉପଚାରରେ ହୋଇପାରୁଛି ଏହି ମାରାତ୍ମକ ରୋଗର ଚିକିତ୍ସା । ତାହା ପୁଣି ମାଗଣାରେ । ଠିକ୍ ଶୁଣିଲେ ଆପଣ, ଏମିତି ଏକ ଚିକିତ୍ସା ସେବା ଚାଲିଛି ଉପାନ୍ତ ମାଲକାନଗିରି ଏମ.ଭି.୧୦୪ ଗାଁରେ । ଯେଉଁଠି ଘରୋଇ ଉପଚାର ପାଇଁ ପ୍ରତିଦିନ ଲାଗୁଛି କିଡନୀ ରୋଗୀଙ୍କ ଭିଡ ।
ଏମ.ଭି.୧୦୪ ଗାଁର ବଙ୍ଗୀୟ ମହିଳା ତରୁଲତା ସରକାର । ପେଶାରେ ସେ କୌଣସି ଡାକ୍ତର ନୁହଁନ୍ତି । ହେଲେ ଘରୋଇ ଉପଚାରରେ ସେ କରୁଛନ୍ତି କିଡନୀ ରୋଗୀଙ୍କ ଚିକିତ୍ସା । ଆଉ ଏହି ଚିକିତ୍ସା ପାଇଁ ତାଙ୍କୁ ମା' କାଳୀଙ୍କ ସ୍ବପ୍ନାଦେଶ ହୋଇଥିଲା । ଘଟଣାଟି ଏମିତି । ତରୁଲତାଙ୍କ ବାପା ଖୋଦ୍ ଜଣେ କିଡନୀ ରୋଗୀ । ପଇସା ଦେଇ ବାପାଙ୍କୁ ଭଲ କରିବାକୁ ଅକ୍ଷମ ତରୁଲତାଙ୍କୁ ହୁଏ ମା' କାଳୀଙ୍କ ସ୍ବପ୍ନାଦେଶ । ଏହା ପରେ ସେ ପୋଡା ଲେମ୍ବୁର ରସକୁ ମା' କାଳୀଙ୍କ ପାଖରେ ଅର୍ପଣ କରି ନିଜ ବାପାଙ୍କୁ ପିଇବାକୁ ଦେଇଥିଲେ । ଏହି ଚିକିତ୍ସା ପରେ ତାଙ୍କ ବାପା ଭଲ ହେଉଥିବା ସେ କହିଛନ୍ତି ।