LRC ଅଧିକାର ପ୍ରହସନ ! 'ଜାଗା ମିଶନ'ରୁ ବଞ୍ଚିତ ହିତାଧିକାରୀ

ଭୂମିହୀନ ସହରାଞ୍ଚଳ ବସ୍ତି ବାସିନ୍ଦା 'ଜାଗା ମିଶନ' ଯୋଜନାରୁ ବଞ୍ଚିତ ହୋଇଥିବା ଅଭିଯୋଗ କରିଛନ୍ତି । ଏହି ଯୋଜନା ପ୍ରସ୍ତୁତ କରି ରାଜ୍ୟ ସରକାର ବେଶ ପ୍ରଶଂସା ସାଉଁଟିଥିବାବେଳେ ମାଲକାନଗିରିରେ ଏହାର ବ୍ୟତିକ୍ରମ ଦେଖିବାକୁ ମିଳିଛି l

ମାଲକାନଗିରି:ଭୂମିହୀନ ସହରାଞ୍ଚଳ ବସ୍ତି ବାସିନ୍ଦା 'ଜାଗା ମିଶନ' ଯୋଜନାରୁ ବଞ୍ଚିତ ହୋଇଥିବା ଅଭିଯୋଗ କରିଛନ୍ତି। ଭୂମି ଅଧିକାର ପ୍ରମାଣପତ୍ର ଯୋଗାଇ ଦେବାକୁ ରାଜ୍ୟ ସରକାର 2017 ରେ ଜାଗା ମିଶନ ନାମରେ ଯୋଜନା ପ୍ରସ୍ତୁତ କରି ଆଇନ ପ୍ରଣୟନ କରିଛନ୍ତି l ହେଲେ ଭୂମିହୀନ ସହରୀ ବସ୍ତି ବାସିନ୍ଦା ସ୍ଥାୟୀ ଭାବରେ ରହି ଜୀବନଯାପନ କରିବାର ସୁଯୋଗ ପାଇ ପାରିନାହାନ୍ତି l ଆଇନରେ ଗୋଟିଏ ନିର୍ଦ୍ଦେଶନାମା ଥିବାବେଳେ ଆଉ ଗୋଟିଏ ମୂଲ୍ୟ ଧାର୍ଯ୍ୟ ହେଉଛି। ମାଲକାନଗିରି ଜିଲ୍ଲାରେ ରହିଛି ଗୋଟିଏ ଏନଏସି ଓ ଗୋଟିଏ ମୁନିସିପାଲିଟି । ଭୂମିହୀନ ବସ୍ତିବାସିନ୍ଦାଙ୍କ ଉଦ୍ଦେଶ୍ୟରେ ଆଇନ ପ୍ରଣୟନ କରିଛନ୍ତି ସରକାର । ହେଲେ ଏହାର ସଫଳ ରୂପାୟନ ହୋଇପାରୁନି।

ଏହି ଆଇନକୁ କାର୍ଯ୍ୟକାରୀ କରିବା ପାଇଁ ପ୍ରଥମ ପ୍ରର୍ଯ୍ୟାୟରେ 2ହଜାର 432ଟି ଘର ସର୍ଭେ କରାଯାଇଥିଲା । ଏଥି ମଧ୍ୟରୁ 2ହଜାର 276ଜଣ ହିତାଧିକାରୀଙ୍କୁ ଯୋଗ୍ୟ ବିବେଚନା ହେଲା। ସେମାନଙ୍କ ମଧ୍ୟରୁ 1ହଜାର 147ଜଣଙ୍କୁ ଜମି ଅଧିକାର ପ୍ରମାଣ ପତ୍ର ପ୍ରଦାନ କରାଯାଇଥିବାବେଳେ 1ହଜାର 130 ଜଣ ବର୍ତ୍ତମାନ ସୁଦ୍ଧା (LRC-Land Right Certificates ) ନେଇପାରିନାହାନ୍ତି । 2017ରେ ପ୍ରଣୟନ ହୋଇଥିବା ଆଇନ ଅନୁଯାୟୀ ସ୍ଥାନୀୟ ଜମିର ବେଞ୍ଚ ମାର୍କ ଭାଲୁଆସନର 25 ପ୍ରତିଶତ ଟଙ୍କା ପୈଠ କରି LRC ନେବାର ନିୟମ ରହିଛି । ମାଲକାନଗିରି ମୁନିସିପାଲିଟିରେ ବସବାସ କରୁଥିବା ବସ୍ତି ବାସିନ୍ଦା ଆର୍ଥିକ ଭାବେ ସ୍ଵଛଳ ନଥିବାରୁ ଏହି ଯୋଜନାରୁ ବଞ୍ଚିତ ହେଉଛନ୍ତି । ଏହି ଯୋଜନାରେ ଅନ୍ତର୍ଭୁକ୍ତ ହୋବା ନେଇ ହିତାଧିକାରୀ ମାନେ ବେଶ ଖୁସି ହୋଇଥଲେ l ଆଉ ଏହି ଯୋଜନା ପ୍ରସ୍ତୁତ କରି ରାଜ୍ୟ ସରକାର ବେଶ ପ୍ରଶଂସା ସାଉଁଟିଥିବାବେଳେ ମାଲକାନଗିରିରେ ଏହାର ବ୍ୟତିକ୍ରମ ଦେଖିବାକୁ ମିଳିଛି l

ଆଇନ ଅନୁସାରେ, ବସ୍ତି ଅଞ୍ଚଳରେ 2017 ପୂର୍ବରୁ ଯେଉଁମାନେ ବସବାସ କରି ଆସୁଥିବେ ସେମାନେ ଏହି ଯୋଜନାରେ ଅନ୍ତର୍ଭୁକ୍ତ ହୋଇପାରିବେ । ହିତାଧିକାରୀ ବେଞ୍ଚ ମାର୍କ ଭାଲୁଆସନର 25% ଟଙ୍କା ପୈଠ କଲେ ସର୍ବାଧିକ 45ବର୍ଗ ମିଟର ଜମିର ଅଧିକାର ପ୍ରଦାନ କରାଯିବ । ଆଉ ସରକାର ସମୟ ଅନୁଯାୟୀ ପ୍ରତିଶତ ମୂଲ୍ୟ ଧାର୍ଯ୍ୟ କରିବା ଦ୍ବାରା ହିତାଧିକାରୀ ଉପକୃତ ହୋଇ ପାରିବେ । ଏଥିରେ ଆର୍ଥିକ ସ୍ବଚ୍ଛଳତା ଦୃଷ୍ଟିରୁ କିଛି ନିର୍ଦ୍ଦିଷ୍ଟ ନିୟମାବଳୀ ଥିଲେ ମଧ୍ୟ ମାଲକାନଗିରିରେ ଦେଖିବାକୁ ମିଳିଛି ବ୍ୟତିକ୍ରମ । ଜିଲ୍ଲା ପ୍ରଶାସନ ସମସ୍ତ ବର୍ଗର ଲୋକଙ୍କୁ ଭ୍ୟାଲୁଏସନର 25% ଦାବି କରୁଛନ୍ତି। ତେବେ ଏସବୁ ଆଇନରୁ ବାହାର ବୋଲି ମାଲକାନଗିରି ମୁନସିପାଲଟିର ପୂର୍ବତନ ନିର୍ବାହୀ ଅଧିକାରୀ କହିଛନ୍ତି ।

ଅପରପକ୍ଷେ ଏହାକୁ ଖଣ୍ଡନ କରି ବର୍ତ୍ତମାନର ନିର୍ବାହି ଅଧିକାରୀ କହିଛନ୍ତି, "ମାଲକାନଗିରି ମୁନିସିପାଲଟିରେ ପୂର୍ବରୁ 29ଟି ବସ୍ତି ସର୍ଭେ କରାଯାଇଥିଲା। ରହିଯାଇଥିବା ଅନ୍ୟ ବସ୍ତି ସର୍ଭେ ପରେ ବେଞ୍ଚ ମାର୍କ ଭ୍ୟାଲୁଏସନ ବଢ଼ି ଯାଇଛି । ବେଞ୍ଚ ମାର୍କ ଭ୍ୟାଲୁ ଅଧିକ ଥିବାରୁ ହିତାଧିକାରୀ LRC ନେବାକୁ ସକ୍ଷମ ହୋଇ ପାରୁନାହାନ୍ତି । ଫଳରେ ପାଖା ପାଖି 50% LRC କାର୍ଯ୍ୟାଳୟରେ ପଡି ରହିଛି । LRC କୋହଳ ନିମନ୍ତେ ମିଶନ ଡାଇରେକ୍ଟର ବେଞ୍ଚ ମାର୍କ ଅନୁଯାୟୀ ମୂଲ୍ୟ ନିର୍ଦ୍ଧାରିତ କରିବା ଆବଶ୍ୟକ ବୋଲି ଜାଗା ମିଶନ ଅଧିକାରୀଙ୍କୁ ଚିଠି ଲେଖିଥିଲେ। ବର୍ତ୍ତମାନ ସରକାରଙ୍କ ନିର୍ଦ୍ଦେଶ ଅନୁଯାୟୀ, ମୂଲ୍ୟ ଗ୍ରହଣ କରାଯାଉଛି।"

ଇଟିଭି ଭାରତ, ମାଲକାନଗିରି