ମାଲକାନଗିରି: ଜିଲ୍ଲାର ସଦର ବ୍ଲକରେ ଶହ ଶହ ଏକର ଧାନ ଏବେ ନଷ୍ଟ ହୋଇଯାଇଥିବା ଦେଖିବାକୁ ମିଳିଛି । ମାଲକାନଗିରି ବ୍ଲକ ଚାଲାଣଗୁଡ଼ା ପଞ୍ଚାୟତର ଏମଭି - ୧ , ଏମଭି - ୪୪ , ଏମଭି - ୯୦ ଗ୍ରାମରେ ଶହ ଶହ ଏକର ଧାନ ଫସଲ ଦେଖିବାକୁ ଡଉଲଡାଉଲ ସିନା ଭିତର ଫମ୍ପା ହୋଇଯାଇଛି । ଏ ନେଇ ଚାଷୀ ଏବେ ମୁଣ୍ଡରେ ହାତ ଦେଇ ବସିଛି ।
ଚାଷୀ ମାଲକାନଗିରିର ବିଭିନ୍ନ ସାର ଦୋକାନରୁ ଧାନ ବିହନ ଆଣି ଜମିରେ ବୁଣିଥିଲେ। । ଏସବୁ ଧାନ ବିହନ କଳାହାଣ୍ଡିରୁ ଆସିଥିବା ନେଇ ଦୋକାନୀ ଚାଷୀଙ୍କୁ କହିଥିଲା । ଆଉ ଚାଷୀ ବି ଦୋକାନୀ କଥା ମାନି ବିହନ ଆଣି ବୁଣିଥିଲା ଓ ଭଳ ଫସଲ ମଧ୍ୟ ହେଲା । କିନ୍ତୁ ଫଳ ଶୂନ୍ୟ । ଚାଷୀର ଖର୍ଚ୍ଚ, ପରିଶ୍ରମ ସବୁ ଫସର ଫାଟିଯାଇଛି ।
ଶତାଧିକ ଚାଷୀ ପ୍ରଶାସନ ନିକଟରେ କ୍ଷତିପୂରଣ ଦାବି କରିଛନ୍ତି । କୃଷି ବିଭାଗର ଭିଏଲଡବ୍ଲ୍ଯୁ ଏବଂ ରାଜସ୍ବ ନିରୀକ୍ଷକ ମଧ୍ୟ ଅଭିଯୋଗ ପାଇ ବିଲ ଗୁଡ଼ିକରେ ପହିଞ୍ଚି ତଦାରଖ କରିଥିଲେ । ଭିଏଲଡବ୍ଲ୍ୟୁ ଙ୍କ କହିବା ଅନୁଯାୟୀ ବିଲରେ ଧାନ ଗଛ ଅଛି ସିନା ଧାନ ଫଳି ନାହିଁ । ନକଲି ବିହନ ଯୋଗୁ ଏଭଳି ହୋଇ ଥାଇପାରେ କିମ୍ବା କାଣ୍ଡରେ ବ୍ଲାଷ୍ଟ ହେବା ଯୋଗୁ ମଧ୍ୟ ଏପରି ହୋଇଥାଏ ବୋଲି ସେ କହିଛନ୍ତି । ଧାନରେ କୌଣସି ପୋକ ଲାଗିନଥିବା ଦେଖିବାକୁ ମିଳିଛି । ସ୍ଥାନୀୟ ସରପଞ୍ଚ ମଧ୍ୟ ଘଟଣାସ୍ଥଳରେ ପହଞ୍ଚି ଦୋକାନୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ଏହାର ତଦନ୍ତ କରାଯାଇ ଚାଷୀଙ୍କୁ କ୍ଷତିପୂରଣ ଦେବାକୁ ଦାବି ହୋଇଛି ।