ମାଲକାନଗିରି: ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ ସିଟିସ୍କାନ ମେସିନ୍ ଲୋକାର୍ପିତ । ନବରଙ୍ଗପୁର ସଂସାଦ ରମେଶ ଚନ୍ଦ୍ର ମାଝୀ କରିଛନ୍ତି ଲୋକାର୍ପଣ । ଏହି ମେସିନ୍ ଲାଗିବା ଦ୍ବାରା ଜିଲ୍ଲା ବାହାରକୁ ଯାଉଥିବା ଦୁର୍ଘଟଣାଗ୍ରସ୍ତ ବ୍ୟକ୍ତି କିମ୍ବା ଅନ୍ୟ କୌଣସି ରୋଗୀ କୋରାପୁଟ, ବିଶାଖାପାଟଣା, ବ୍ରହ୍ମପୁର ଓ କଟକ ଭଳି ବାହାର ମେଡିକାଲକୁ ସ୍କାନିଂ ପାଇଁ ଯିବାକୁ ପଡିବନି । ବରଂ ଏଠାରେ ହିଁ ସେମାନଙ୍କ ସ୍କାନିଂ ରିପୋର୍ଟ ପାଇବା ପରେ ଚିକିତ୍ସା ହୋଇପାରିବ । ସେହିପରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଆଉ ଯେଉଁ ସବୁ ଦରକାରୀ ଯନ୍ତ୍ରପାତିର ଆବଶ୍ୟକ ରହିଛି ତାହାର ସମାଧାନ କରାଯିବ ବୋଲି କହିଛନ୍ତି ସାଂସଦ ।
ଅନ୍ୟପଟେ ଏହି ଉଦଘାଟନୀ ଉତ୍ସବରେ ମାଲକାନଗିରି ବିଧାୟକ ଆଦିତ୍ୟ ମାଡି ଓଡିଶା ସରକାରଙ୍କ ଏହି ପଦକ୍ଷେପକୁ ପ୍ରଶଂସା କରିବା ସହ ଧନ୍ୟବାଦ ଦେଇଛନ୍ତି । ଏଥିସହ ସେ କହିଛନ୍ତି ଯେ ତାସହ ଏହି ମେସିନ ଚଳାଇବା ପାଇଁ ଆବଶ୍ୟକୀୟ ଟେକ୍ନିକାଲ୍ କର୍ମଚାରୀଙ୍କ ସହ ରେଡିଓଲୋଜିଷ୍ଟ୍ ଡାକ୍ତରଙ୍କ ଆବଶ୍ୟକତା ରହିଛି । ଏଣୁ ଏହା ବାବଦରେ ଓଡ଼ିଶା ସରକାରଙ୍କ ଦୃଷ୍ଟିଗୋଚର କରାଇବେ କହିଛନ୍ତି ମାଲକାନଗିରି ବିଧାୟକ ।
ସେହିଭଳି ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି, "ମୁଖ୍ୟମନ୍ତ୍ରୀଙ୍କର ଏହି ଜିଲ୍ଲା ଫୋକସରେ ରହିଛି । ତେଣୁ ଓଡ଼ିଶାର କିଛି ଜିଲ୍ଲା ସହ ମାଲକାନଗିରି ଜିଲ୍ଲାକୁ ଏହି ମେସିନ ଯୋଗାଇ ଦିଆଯାଇଛି । ଏହି ମେସିନ୍ଟି ମେଡ୍ ଇନ୍ ଜାପାନ୍ର ହୋଇଥିବା ବେଳେ ଏହାର ମୁଲ୍ୟ ୧କୋଟି ୨୮ ଲକ୍ଷ ଟଙ୍କା । ଏହି ମେସିନ ଚଳାଇବା (ପରିଚାଳନା) ପାଇଁ ADD NXG ନାମକ ଏକ ଏଜେନ୍ସିକୁ ଦାୟିତ୍ବ ଦିଆଯାଇଛି । ଏଜେନ୍ସି ପକ୍ଷରୁ ୬ ଜଣ ଟେକ୍ନିସିଆନ୍ ଦିଆଯାଇଛି । ରିପୋର୍ଟ ପାଇଁ ରେଡିଓ ଲଜିଷ୍ଟଙ୍କ ପାଖକୁ ପଠାଯାଇ ୮ଘଣ୍ଟା ମଧ୍ୟରେ ରିପୋର୍ଟ ରୋଗୀଙ୍କୁ ଦିଆଯିବ କହିଛନ୍ତି ସିଡିଏମଓ ।