ଦିନକୁ ଦିନ ଅସହ୍ୟ ହେଉଛି ଯନ୍ତ୍ରଣା, ଇଚ୍ଛାମୃତ୍ୟୁ ମାଗୁଛି ‘ଚମ୍ପା’

ମାଲକାନଗିରିର ଝିଅ ଚମ୍ପା । ଯେଉଁ ବୟସରେ ହସିଖେଳି ସାଙ୍ଗମାନଙ୍କ ସହ ସମୟ ବିତାଇବା କଥା । ସେହି ବୟସରେ ମାଗୁଛନ୍ତି ଇଚ୍ଛାମୃତ୍ୟୁ । କିନ୍ତୁ କାହିଁକି ? ଅଧିକ ପଢନ୍ତୁ ।

ମାଲକାନଗିରି: ନାଁ ତାଙ୍କର ଚମ୍ପା । ଫୁଲ ଭଳି ପ୍ରସ୍ଫୁଟିତ ହେବା ଆଗରୁ ଝିଅଟି ଚାହୁଁଛି ଇଚ୍ଛାମୃତ୍ୟୁ । ଦୀର୍ଘ 13 ବର୍ଷର ଅସହ୍ୟ ଯନ୍ତ୍ରଣାକୁ ଆଉ ସହିପାରୁନାହାନ୍ତି ସେ । କଷ୍ଟ ଜର୍ଜରିତ ଜୀବନରେ ପକାଇବାକୁ ଚାହୁଛନ୍ତି ପୂର୍ଣ୍ଣଚ୍ଛେଦ । ପରିବାର ଲୋକ ବି ଝିଅକୁ ଯମ ଯନ୍ତ୍ରଣାରେ ଝୁଝୁଥିବା ଦେଖି ଅସହାୟ ହୋଇ ପଡିଛନ୍ତି । ଏଭଳି ସ୍ଥିତିରେ ମୁଖ୍ୟମନ୍ତ୍ରୀଙ୍କୁ ଇଚ୍ଛାମୃତ୍ୟୁ ପାଇଁ ଆବେଦନ କରିଛନ୍ତି ମାଲକାନଗିରିର ଆଦିବାସୀ ଝିଅ ଚମ୍ପା କାଲକୁରା ।

କାନ୍ଦିବାକୁ ଆଖିରେ ଲୁହ ନାହିଁ । ଦୁଃଖ ବଖାଣିବାକୁ ପାଟିରେ ଭାଷା ନାହିଁ । ଅସହ୍ୟ ଯନ୍ତ୍ରଣାରେ ଛଟପଟ ଜୀବନ । ନା ଆଶା ଅଛି ନା ଭରସା । ବଞ୍ଚିବାର ସବୁ ଆଶା ଯେମିତି ମଉଳି ଯାଇଛି । ସେଥିପାଇଁ ତ କାଗଜ ଖଣ୍ଡିଏରେ ଲେଖିଦେଇଛି ସବୁ ବେଦନା । ଆଉ ମାଗୁଛି ଇଚ୍ଛାମୃତ୍ୟୁ । ଆମେ କୁହୁଛୁ ମାଲକାନଗିରି ଜିଲ୍ଲା ମାଥିଲି ବ୍ଲକ ସର୍ଗୀଗୁଡାରେ ରହୁଥିବା 24 ବର୍ଷୀୟ ଚମ୍ପା କାଲକୁରାଙ୍କ କଥା ।

ଯେଉଁ ବୟସରେ ସାଙ୍ଗମେଳିରେ ଖୁସି ବାଣ୍ଟିବା କଥା, ସେଇ ବୟସରେ ସେ ହୋଇପଡିଛନ୍ତି ଶଯ୍ୟାଶାୟୀ । ସେ ଆଉ ସହିପାରୁନାହାନ୍ତି ଯନ୍ତ୍ରଣା । ଏଥିପାଇଁ ମୁଖ୍ୟମନ୍ତ୍ରୀଙ୍କୁ ପତ୍ର ଲେଖି ଇଚ୍ଛାମୃତ୍ୟୁ ମାଗିଛନ୍ତି ।

ସବୁ ଚାଲିଥିଲା ଠିକ୍‌ଠାକ୍ । ହେଲେ ହଠାତ୍ 2006ରେ ଚମ୍ପା ଯେତେବେଳେ ସପ୍ତମ ଶ୍ରେଣୀରେ ପଢୁଥିଲେ, ତାଙ୍କୁ ଅଜଣା ରୋଗ ଗ୍ରାସି ଥିଲା । ଏହାପରେ ସେ ଶଯ୍ୟାସାୟୀ ହୋଇଗଲେ । ମସିହାରେ ସେହିଦିନ ଠୁ ଖାଇବା ଠାରୁ ଆରମ୍ଭ କରି ଗାଧୋଇବା ଓ ଶୌଚ ପର୍ଯ୍ୟନ୍ତ ସବୁ କାମ ପାଇଁ ସେ ଅନ୍ୟ ଉପରେ ନିର୍ଭର କରୁଛନ୍ତି । ଏକମାତ୍ର ଗେହ୍ଲା ଝିଅକୁ ଏପରି ଅବସ୍ଥାରେ ଦେଖି ପରିବାରଲୋକେ ଯେମିତି ମରି ମରି ଜିଉଁଛନ୍ତି । ଆଉ ଝିଅକୁ ଠିକ୍ କରିବା ପାଇଁ ସର୍ବସ୍ବାନ୍ତ ମଧ୍ୟ ହୋଇଗଲେଣି । ଏପରି ସ୍ଥିତିରେ ଲୋଡିଛନ୍ତି ସରକାରୀ ସହାୟତା ।

ଚମ୍ପା ଉପରେ ଯଦି ସରକାରଙ୍କ ଶୁଭ ଦୁଷ୍ଟି ପଡନ୍ତା । ଫୁଲଟି ପରି ଝଡି ମଉଳିଯିବା ଆଗରୁ ପ୍ରସ୍ଫୁଟିତ ହୋଇଉଠନ୍ତା ଏହି ଆଦିବାସୀ ଝିଅ ।

ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ