ମାଲକାନଗିରି: ମାନବିକତା ଦେଖାଇଲେ ମାଲକାନଗିରି ଅତିରିକ୍ତ ତହସିଲଦାର ଜଗଦିଶ କାରତାମି । ଅସହାୟ ମହିଳାଙ୍କୁ ଉଦ୍ଧାର କରି ପଠାଇଲେ ହସ୍ପିଟାଲ ।
ମାନବିକତା ଦେଖାଇଲେ ଅତିରିକ୍ତ ତହସିଲଦାର ଘଟଣାଟି ଏମିତି । ଆଜି (ଶନିବାର) ସକାଳ ପ୍ରାୟ ନ’ ଟା ସମୟରୁ ଏକ ମହିଳା ସଂଧ୍ୟା ପାଞ୍ଚ’ ଟା ଯାଏଁ ଉପ-ଜିଲ୍ଲାପାଳଙ୍କ କାର୍ଯ୍ୟାଳୟ ମୁଖ୍ୟ ଗେଟ ନିକଟରେ ଶୋଇ ରହିଥିଲେ। ନୂଆ ବର୍ଷ ଥିବାରୁ ଉପ-ଜିଲ୍ଲାପାଳଙ୍କୁ ଶୁଭେଚ୍ଛା ଜଣାଇବା ପାଇଁ କାର୍ଯ୍ୟାଳୟକୁ ବହୁ ଅଧିକାରୀ ଓ କର୍ମଚାରୀ ଯିବା ଆସିବା କରୁଥିଲେ ମଧ୍ୟ ଶୋଇ ରହିଥିବା ଅସହାୟ ମହିଳାଙ୍କ ଉପରେ କାହାରି ନଜର ପଡିନଥିଲା ।
ତେବେ ସଂଧ୍ୟା 5 ଟା ସମୟରେ ଅତିରିକ୍ତ ତହସିଲଦାର ଜଗଦିଶ କାରତାମି କିଛି କାମରେ ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସୁଥିବା ବେଳେ ହଠାତ ମହିଳାଙ୍କୁ ଦେଖି ତାଙ୍କ ପାଖକୁ ଯାଇଥିଲେ । ମହିଳା ଜଣଙ୍କ ଅସୁସ୍ଥ ଥିବା ଜାଣିବା ପରେ କିଛି ସ୍ଥାନୀୟ ଲୋକଙ୍କ ସହାୟତାରେ ଉକ୍ତ ମହିଳାଙ୍କୁ ଏକ ଅଟୋ ଦ୍ବାରା ହସପିଟାଲ ପହଞ୍ଚାଇଥିଲେ ।
ତେବେ ସେହି ମହିଳା ଜଣକ ସ୍ଥାନୀୟ ତଳସାହିର ବୋଲି ଜଣାପଡିଛି । ହେଲେ ତାଙ୍କର ନିଜର ବୋଲି କେହି ନାହାଁନ୍ତି । ଅତିରିକ୍ତ ତହସିଲଦାର ଜଗଦିଶ କାରତାମିଙ୍କ ଏପରି ମାନବୀୟ କାର୍ଯ୍ୟକୁ ଏବେ ସମସ୍ତେ ପ୍ରଶଂସା କରୁଛନ୍ତି ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
