ମାଲକାନଗିରି: ଆଗକୁ ସାଧାରଣ ନିର୍ବାଚନ ଆସୁଥିବାରୁ ଏହା ପୂର୍ବରୁ ରାଜ୍ୟର ବିଭିନ୍ନ ଜିଲ୍ଲାରେ ଲୋକାଭିମୁଖୀ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରୁଛନ୍ତି ରାଜ୍ୟ ସରକାର । ତେବେ ବର୍ତ୍ତମାନ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ତଥା 5T ସଚିବ ଭିକେ ପାଣ୍ଡିଆନ ବିଭିନ୍ନ ଜିଲ୍ଲା ଗସ୍ତ କରି ଲୋକଙ୍କ ବିଭିନ୍ନ ସମସ୍ୟା ବୁଝୁଥିବା ଦେଖିବାକୁ ମିଳିଛି । ଏହି ପରିପ୍ରେକ୍ଷୀରେ ଦୁଇ ଦିନିଆ ମାଲକାନଗିରି ଜିଲ୍ଲା ଗସ୍ତରେ ଆସିଛନ୍ତି ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ତଥା ଓଡିଶା ସରକାରଙ୍କ 5T ସଚିବ ଭିକେ ପାଣ୍ଡିଆନ ।
ମଙ୍ଗଳବାର ପ୍ରଥମେ ହେଲିକପ୍ଟର ଯୋଗେ ମାଥିଲି ହେଲିପ୍ୟାଡ୍ରେ ପହଞ୍ଚିବା ପରେ ମାଥିଲିସ୍ଥିତ ଶିବ ସାଗର ବୁଲି ଦେଖିଥିଲେ 5T ସଚିବ । ସେଠାରେ ସେ ଜିଲ୍ଲା ପ୍ରଶାସନର ଅଧିକାରୀଙ୍କ ସହ ଶିବ ସାଗରର ଉନ୍ନତୀକରଣ ବିଷୟରେ ଆଲୋଚନା କରିବା ସହ ପ୍ରସ୍ତାବିତ ସପ୍ତଧାରା ଜଳସେଚନ ପ୍ରକଳ୍ପ ଓ ପ୍ରସ୍ତାବିତ ରେଳ ଲାଇନ୍ ଉପରେ ଆଲୋଚନା କରିଥିଲେ । ସେଠାରୁ ସେ ମାଥିଲିସ୍ଥିତ ସହିଦ୍ ଲକ୍ଷ୍ମଣ ନାୟକ ଭବନକୁ ଉଦ୍ଘାଟନ କରିବା ପରେ ସେଠାରେ ଉପସ୍ଥିତ ସାଧାରଣ ଲୋକଙ୍କ ସହ ବିଭିନ୍ନ ସମସ୍ୟା ପ୍ରସଙ୍ଗରେ ଆଲୋଚନା କରିଥିଲେ ।
ପରେ ସେ ମାଥିଲିଠାରୁ ହେଲିକପ୍ଟର ଯୋଗେ ଖଇରପୁଟ ବ୍ଲକର ବଣ୍ଡାଘାଟି ହେଲିପ୍ୟାଡ୍ରେ ପହଞ୍ଚି ମୁଦୁଲିପଡା ପଞ୍ଚାୟତସ୍ଥିତ ସୀତାକୁଣ୍ଡ ବୁଲି ଦେଖିଥିଲେ । ସୀତାକୁଣ୍ଡର କିଭଳି ଉନ୍ନତୀକରଣ କରାଯିବ, ସେନେଇ ଆଲୋଚନା କରିଥିଲେ । ଏଠାରେ ଉଲ୍ଲେଖଯୋଗ୍ୟ, ଗତ ଫେବୃଆରୀ ୨୩ ତାରିଖରେ ଇଟିଭି ଭାରତରେ ସୀତାକୁଣ୍ଡ ଅବହେଳିତ ହୋଇ ରହିଥିବା ଖବର ପ୍ରକାଶ ପାଇଥିଲା । ଏହାପରେ ସୀତାକୁଣ୍ଡକୁ 5T ସଚିବଙ୍କ ଗସ୍ତ ହୋଇଛି । ସେଠାରୁ ସେ ପୁନଶ୍ଚ ଦେଲିକ୍ୟାପ୍ଟର ଯୋଗେ ଚିତ୍ରକୋଣ୍ଡା ବ୍ଲକର ସ୍ବାଭିମାନ ଅଞ୍ଚଳସ୍ଥିତ ହନ୍ତାଳଗୁଡା BSF କ୍ୟାମ୍ପ ଠାରେ ପହଞ୍ଚିଥିଲେ । ସେଠାରୁ ସେ ହନ୍ତାଳଗୁଡା ନିକଟରେ ଥିବା ଭିୟୁ ପଏଣ୍ଟରେ ପହଞ୍ଚି ଏହାର ଉନ୍ନୟନ କାମ ଦେଖିବା ସହ ସେଠାରୁ ସ୍ବାଭିମାନ ଅଞ୍ଚଳର ମନରୋମ ଦୃଶ୍ୟ ଉପଭୋଗ କରିଥିଲେ । ଏହାପରେ ହନ୍ତାଳଗୁଡା ଓ ଆଖପାଖ ଅଞ୍ଚଳର ଗ୍ରାମବାସୀଙ୍କ ସହ ମିଶି ଆଲୋଚନା କରି ସୁବିଧା ଅସୁବିଧା ପଚାରି ବୁଝିଥିଲେ ।