କୋରାପୁଟ: ଚାକିରି ଦେବା ଆଳରେ ବିବାହିତା ମହିଳାଙ୍କୁ ଯୌନ ନିର୍ଯ୍ୟାତନା । କୋରାପୁଟ ଲକ୍ଷ୍ମୀପୁରରୁ ସାମ୍ନାକୁ ଆସିଛି ଏହି ଅଭିଯୋଗ । ଅଭିଯୋଗ ପରେ ସମ୍ପୃକ୍ତ ଯୁବକଙ୍କୁ ଟାଉନ ଥାନା ପୋଲିସ ଅଟକ ରଖିଛି । ଅଭିଯୁକ୍ତ ଲକ୍ଷ୍ମୀପୁର ବ୍ଲକ ବୁର୍ଜା ଗ୍ରାମର ତୁଷାରକାନ୍ତି ତୁରୁ ହୋଇଥିବା ଜଣାପଡିଛି ।
ଟାଉନ ଥାନାଧିକାରୀ ଧୀରେନ ପଟ୍ଟନାୟକଙ୍କ କହିବାନୁଯାୟୀ, ତୁଷାର ଜଣେ ମହିଳାଙ୍କୁ ଚାକିରି କରାଇ ଦେବ ବୋଲି ପ୍ରତିଶ୍ରୁତି ଦେଇଥିଲା ଏବଂ ଚାକିରି ବାବଦରେ କଥାବାର୍ତ୍ତା କରିବା ବାହାନାରେ ତାଙ୍କୁ କୋରାପୁଟ ସହରର ଏକ ହୋଟେଲକୁ ଡକାଇଥିଲା । କିନ୍ତୁ ହୋଟେଲ ରୁମରେ ମହିଳାଙ୍କୁ ଇଚ୍ଛା ବିରୁଦ୍ଧରେ ଯୁବକ ଜଣକ ତାଙ୍କୁ ଯୌନ ନିର୍ଯ୍ୟାତନା ଦେଇଥିବା ଅଭିଯୋଗ ହୋଇଛି । ବର୍ତ୍ତମାନ ଅଭିଯୁକ୍ତକୁ ପୋଲିସ ଅଟକ ରଖିଥିବାବେଳେ ଉଭୟଙ୍କ ଡାକ୍ତରୀ ମାଇନା କରାଯାଇଥିବା ସୂଚନା ମିଳିଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
