ଦାବି ପୂରଣ ନହେଲେ ଆବାସିକ ବିଦ୍ୟାଳୟରେ ରନ୍ଧା ହେବନି ଖାଦ୍ୟ !

ସ୍ଥାୟୀ ନିଯୁକ୍ତି ଓ ବର୍ଦ୍ଧିତ ଦରମା ଦାବି ପୂରଣ ନହେଲେ ଚଟୁ ଛାଡ ଆନ୍ଦୋଳନ କରିବା ନେଇ ଚେତାବନୀ ଦେଇଛନ୍ତି କୋରାପୁଟ ଜିଲ୍ଲା ଆଦିବାସୀ ଓ ହରିଜନ ଉନ୍ନୟନ ବିଭାଗ ଦ୍ବାରା ପରିଚାଳିତ ଆବାସିକ ବିଦ୍ୟାଳୟର କର୍ମଚାରୀ । ଅଧିକ ପଢ଼ନ୍ତୁ...

କୋରାପୁଟ: 15 ଦିନରେ ଦାବି ପୂରଣ ନହେଲେ ଚଟୁ ଛାଡ଼ ଆନ୍ଦୋଳନ କରିବେ ବୋଲି କହିଛନ୍ତି ଜିଲ୍ଲାର ଆଦିବାସୀ ଓ ହରିଜନ ଉନ୍ନୟନ ବିଭାଗ ଦ୍ବାରା ପରିଚାଳିତ ଆବାସିକ ବିଦ୍ୟାଳୟ ଗୁଡିକର ରାନ୍ଧୁଣିଆ ଓ ସେବାୟତ । ଏନେଇ ଶନିବାର ବୈଠକ ଅନୁଷ୍ଠିତ ହୋଇଛି ଯେଉଁଥିରେ ଜିଲ୍ଲାର 14ଟି ବ୍ଲକର ସମସ୍ତ ଆବାସିକ ବିଦ୍ୟାଳୟର ରାନ୍ଧୁଣିଆ ଓ ସେବାୟତ ଯୋଗ ଦେଇଥିଲେ ।

ସ୍ଥାୟୀ ନିଯୁକ୍ତି ଓ ବର୍ଦ୍ଧିତ ଦରମା ନେଇ ଏମାନେ ଅନେକ ଦିନ ଧରି ଦାବି କରି ଆସୁଥିଲେ ମଧ୍ୟ ସରକାର ତାଙ୍କ କାଥାକୁ କର୍ଣ୍ଣପାତ କରିନାହାନ୍ତି । ଯଦି 15 ଦିନ ମଧ୍ୟରେ ସମସ୍ତ ଦାବି ପୂରଣ ନକରାଯାଏ ତେବେ ଚଟୁ ଛାଡ଼ ଆନ୍ଦୋଳନ ଆରମ୍ଭ କରିବେ ବୋଲି ଚେତାବନୀ ଦେଇଛନ୍ତି ରାନ୍ଧୁଣିଆ ଓ ସେବାୟତ।

ସଂଘର ସଦସ୍ୟଙ୍କ କହିବାନୁଯାୟୀ ଗତ ତିରିଶି ବର୍ଷ ଧରି ଦିନକୁ ଚବିଶ ଘଣ୍ଟା ପିଲାଙ୍କ ସେବାରେ କାର୍ଯ୍ୟରେ ନିୟୋଜିତ ଥିବା ସତ୍ତ୍ବେ ସରକାର ଠିକ ଭାବେ ତାଙ୍କ ବେତନ ବୃଦ୍ଧି କରୁନାହାନ୍ତି କିମ୍ବା ତାଙ୍କ ପଦବୀକୁ ସ୍ଥାୟୀ କରୁନାହାନ୍ତି ।

କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ