ସ୍ବାଧୀନତା ଦିବସରେ ଦିଆଯିବ ଜଳ ସଂରକ୍ଷଣ ସଚେତନତାର ବାର୍ତ୍ତା

ଚଳିତ ବର୍ଷ ସ୍ବାଧିନତା ଦିବସ ଅବସରରେ କୋରାପୁଟରେ ଦିଆଯିବ ଜଳ ସଂରକ୍ଷଣ ସଚେତନତାର ବାର୍ତ୍ତା । ଜିଲ୍ଲାପାଳ ପୋମା ଟୁଡୁଙ୍କ ଅଧ୍ୟକ୍ଷତାରେ ଆୟୋଜିତ ସ୍ବାଧୀନତା ଦିବସ ପ୍ରସ୍ତୁତି ବୈଠକରେ ଏହା ନିଷ୍ପତ୍ତି ନିଆଯାଇଛି ।

କୋରାପୁଟ: ଆଉ କିଛି ଦିନ ପରେ ଦେଶର ପୁରପଲ୍ଲୀ ଠାରୁ ଆରମ୍ଭ କରି ସହର ବଜାର ସବୁଠାରେ ପାଳିତ ହେବ ସ୍ବାଧିନତା ଦିବସ । ଚଳିତବର୍ଷ ଜିଲ୍ଲା ସ୍ତରୀୟ ସ୍ବାଧୀନତା ଦିବସ ପାଳନ ଅବସରରେ କୋରାପୁଟ ଜିଲ୍ଲା ପ୍ରଶାସନ ପକ୍ଷରୁ ନୂଆ ପଦକ୍ଷେପ ନିଆଯାଇଛି । ଜଳ ସଂରକ୍ଷଣ , ଜଳର ଉପଯୁକ୍ତ ବ୍ୟବହାର ଓ ଭୂମିରେ ଜଳସ୍ତର ବୃଦ୍ଧି କରିବା ପାଇଁ ଜନ ସଚେତନତା ସୃଷ୍ଟି କରିବା ଦିଗରେ ବିଶେଷ ପଦକ୍ଷେପ ନେବା ପାଇଁ ନିଷ୍ପତ୍ତି ନିଆଯାଇଛି । ଯାହା ଅଗଷ୍ଟ 15 ତାରିଖରୁ ଆରମ୍ଭ ହେବ ।

କୋରାପୁଟ ଜିଲ୍ଲାପାଳ ପୋମା ଟୁଡୁଙ୍କ ଅଧ୍ୟକ୍ଷତାରେ ଆୟୋଜିତ ସ୍ବାଧୀନତା ଦିବସ ପ୍ରସ୍ତୁତି ବୈଠକରେ ଏନେଇ ଚର୍ଚ୍ଚା ହେବା ପରେ ସର୍ବସମ୍ମତି କ୍ରମେ ଏକ ପ୍ରସ୍ତାବ ଗୃହୀତ ହୋଇଥିଲା । ଚଳିତ ବର୍ଷ ସରକାରୀ ବିଭାଗ ଦ୍ୱାରା ପ୍ରସ୍ତୁତ ହେଉଥିବା ପ୍ରଜ୍ଞାପନ ମେଢ ଗୁଡିକ ଜଳ ସଂରକ୍ଷଣର ବାର୍ତ୍ତା ଦିଆଯିବ।

ଏହାସହିତ ସ୍ବାଧୀନତା ଦିବସ ପାଳନ ଅବସରରେ ପିଲାଙ୍କ ମଧ୍ୟରେ ଆୟୋଜିତ ହେଉଥିବା ବିଭିନ୍ନ ପ୍ରତିଯୋଗିତାରେ ମଧ୍ୟ ଜଳ ସମ୍ପଦ ସଂକ୍ରାନ୍ତୀୟ ବାର୍ତ୍ତାର ପ୍ରସାର କରାଯିବ ବୋଲି ଏହି ବୈଠକରେ ନିଷ୍ପତ୍ତି ନିଆଯାଇଛି । ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ପୋଲିସ ପ୍ୟାରେଡ଼ ପଡ଼ିଆରେ ଚିତ୍ତାକର୍ଷକ ପ୍ୟାରେଡ଼ ସହିତ ବିଭିନ୍ନ ବିଦ୍ୟାଳୟର ଛାତ୍ରଛାତ୍ରୀଙ୍କ ଦ୍ୱାରା ଶାରୀରିକ କ୍ରୀଡା କୌଶଳର ପ୍ରଦର୍ଶନ କରାଯିବ ।

କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ