କୋରାପୁଟ: କୋରାପୁଟ ଏକ ଆଦିବାସୀ ବହୁଳ ଜିଲ୍ଲା ଭାବେ ଜଣାଶୁଣା । ଆଦିବାସୀ ସମ୍ପ୍ରଦାୟର ଭିନ୍ନ ପରମ୍ପରା। ଏହି ଜିଲ୍ଲାରେ ଥିବା ବିଭିନ୍ନ ଆଦିବାସୀ ସମ୍ପ୍ରଦାୟର ଭିନ୍ନ ଭିନ୍ନ ଉତ୍ସବ ଜିଲ୍ଲାରେ ଆଦିବାସୀ ପରମ୍ପରାକୁ ଏକ ନୂତନ ପରିଚୟ ପ୍ରଦାନ କରିଛି । ବର୍ଷର ଏହି ସମୟଟି କୋରାପୁଟର ଆଦିବାସୀଙ୍କ ପାଇଁ ମହାଆନନ୍ଦର ସମୟ । ବୈପାରିଗୁଡା ବ୍ଲକ ଅନ୍ତର୍ଗତ ପ୍ରସିଦ୍ଧ ଗୁପ୍ତେଶ୍ୱର ଶୈବପୀଠ ନିକଟ ଜଙ୍ଗଲ ମଧ୍ୟରେ ଥିବା ସିରିବେଡା ଗ୍ରାମରେ ଦୁରୁଆ ଜନଜାତି ଆନନ୍ଦ ଉଲ୍ଲାସର ସହ ଚୈତ୍ର ପର୍ବ ପାଳନ କରିଛନ୍ତି ।
ପ୍ରକୃତିକୁ କୃତଜ୍ଞତା ଜଣାଇ ଚୈତ୍ର ପର୍ବର ଶୁଭାରମ୍ଭ କଲେ କୋରାପୁଟର ଦୁରୁଆ ଜନଜାତି
ଶିରିବେଡ଼ା ସମେତ ଓଡ଼ିଶା ଓ ଛତିଶଗଡ଼ରେ ଡୁରୁଆ ପରିବାର ବସବାସ କରୁଥିବା ୨୦ ରୁ ଉର୍ଦ୍ଧ୍ବ ଗ୍ରାମର ଲୋକେ ଓ ଗାଁ ପୂଜକ ଦିଶାରୀ ଶିରିବେଡା ନିକଟସ୍ଥ ଏକ ପଥର ଗୁମ୍ଫା ନିକଟରେ ଏକତ୍ରିତ ହୋଇ ପାରମ୍ପରିକ ରୀତିରେ ଚୈତ୍ର ଯାତ୍ରାର ଶୁଭାରମ୍ଭ କରିଛନ୍ତି । ଶନିବାର ଏହି ଜନଜାତିର ଲୋକେ ଆମ୍ବ ଖାଇବା ଆରମ୍ଭ କରିବା ସହ ଚାଷୀମାନେ ପାହାଡ଼ ଡଙ୍ଗରରେ ଧାନ ଓ ମାଣ୍ଡିଆ ବିହନ ବୁଣିବାକୁ ଆରମ୍ଭ କରିଥାନ୍ତି ।