କୋରାପୁଟ: ଶାବର ଶ୍ରୀକ୍ଷେତ୍ରରେ ହେବ ରଥଯାତ୍ରା । ସୋମବାର ପୂର୍ବ ବର୍ଷ ଭଳି ଶାବର ଶ୍ରୀକ୍ଷେତ୍ରରେ ପାଳିତ ହେବ ରଥଯାତ୍ରା । କୋରାପୁଟସ୍ଥିତ ଶ୍ରୀ ଜଗନ୍ନାଥ ମନ୍ଦିରର ମେଘନାଦ ପାଚେରୀ ଭିତରେ ରଥଯାତ୍ରା ଅନୁଷ୍ଠିତ ହେବ ବୋଲି ମନ୍ଦିରର ସମ୍ପାଦକ ଗଦାଧର ପରିଡା ସ୍ପଷ୍ଟ କରିଛନ୍ତି । ତେବେ ମନ୍ଦିର ପରିଚାଳନା କମିଟି ଆନୁକୂଲ୍ୟରେ ମନ୍ଦିର ପରିସର ମଧ୍ୟରେ କୋଭିଡ ନିୟମକୁ ପାଳନ କରି ଚଳିତ ବର୍ଷ ମଧ୍ୟ ଭକ୍ତଙ୍କ ବିନା ଉପସ୍ଥିତିରେ ରଥଯାତ୍ରା ସମ୍ପନ୍ନ କରାଯିବ ।
ଚଳିତବର୍ଷ ସରକାରଙ୍କ କୋଭିଡ ଗାଇଡଲାଇନ ନିର୍ଦ୍ଦେଶନାମାକୁ ଆଧାର କରି ଭକ୍ତଙ୍କ ଅନୁପସ୍ଥିତିରେ କୋରାପୁଟର ମନ୍ଦିର ପରିସରରେ ହିଁ ବିଧି ବିଧାନକୁ ରକ୍ଷା କରି କିଛି ହାତଗଣତି ସେବକଙ୍କ ଦ୍ବାରା ଯାତ୍ରା ଅନୁଷ୍ଠିତ ହେବ ବୋଲି ଶ୍ରୀ ପରିଡା ସୂଚନା ଦେଇଛନ୍ତି । ଶ୍ରୀକ୍ଷେତ୍ରର ମେଘନାଦ ପାଚେରୀ ମଧ୍ୟରେ ରଥ ଗଡୁନ ଥିଲେ ହେଁ ରଥଯାତ୍ରାଠୁ ବାହୁଡା ଯାତ୍ରା ପର୍ଯ୍ୟନ୍ତ ରଥ ଉପରେ ହେବାକୁ ଥିବା ସମସ୍ତ ରୀତିନୀତିକୁ ସମ୍ପନ୍ନ କରାଯିବ । ମେଘନାଦ ପାଚେରୀ ମଧ୍ୟରେ ମୁଖ୍ୟମନ୍ଦିରର ଠିକ ପଛ ପଟେ ଅସ୍ଥାୟୀ ଭାବେ ଶ୍ରୀଗୁଣ୍ଡିଚା ମନ୍ଦିର ନିର୍ମାଣ କରାଯାଇଛି, ଯେଉଁଠାରେ କି ତିନି ଠାକୁର ନଅଦିନ ଧରି ବିଭିନ୍ନ ବେଶରେ ସଜ୍ଜିତ ହୋଇ ଦର୍ଶନ ଦେବେ ।