କୋରାପୁଟ : ଋତୁରାଜ ବସନ୍ତର ଆଗମନରେ ହସି ଉଠୁଛି ପ୍ରକୃତିରାଣୀ । ମୃଦୁ ମଳୟ ସାଙ୍ଗକୁ କୋଇଲିର କୁହୁ କୁହୁ ରାବ ପ୍ରକୃତି ମନରେ ନୂଆ ଉନ୍ମାଦନା ସୃଷ୍ଟି କରୁଛି। ପେନ୍ଥା ପେନ୍ଥା ବେଉଳର ମହମହ ବାସ୍ନାରେ ଆନମନା ସଭିଏଁ ।
ଆମ୍ବ ଗଛରେ ନେସି ହେଲାଣି ପେନ୍ଥା ପେନ୍ଥା ବଉଳ, ମହକୁଛି ପୁରା କୋରାପୁଟ
ପ୍ରକୃତିର ଗନ୍ତାଘର କୋରାପୁଟ ଜିଲ୍ଲା । ବସନ୍ତର ଆଗମନରେ ରାସ୍ତା କଡରେ ଥିବା ଆମ୍ବ ଗଛ ଗୁଡିକରେ ବଉଳ ଆସିଛି । ରାସ୍ତାକଡଠାରୁ ଆରମ୍ଭ କରି ବାଡ଼ି ବଗିଚା ପର୍ଯ୍ୟନ୍ତ ବସନ୍ତ ଭରି ଦେଇଛି ଆମ୍ବ ବଉଳ ।
କେତେକ ଆମ୍ବ ଗଛରେ ଏତେ ବଉଳ ଆସିଛି ଯେ ପତ୍ରଟିଏ ମଧ୍ୟ ଦେଖାଯାଉନାହିଁ । କିନ୍ତୁ ଜଳବାୟୁ ପରିବର୍ତ୍ତନର ପ୍ରଭାବରେ ଏଥର ଆମ୍ବ ଗଛରେ ବଉଳ ଆସିବାରେ କିଛି ବିଳମ୍ବ ଘଟିଛି । ରାସ୍ତା ଚଉଡା କରିବା ପ୍ରକ୍ରିୟାରେ ଅନେକ ଆମ୍ବଗଛ ଟଳି ପଡ଼ିଥିବା ଯୋଗୁଁ ରାସ୍ତାକଡ଼ରେ ଶୋଭା ପାଉଥିବା ଗଛରେ ପ୍ରକୃତିପ୍ରେମୀଙ୍କୁ ମୋହିତ କରୁଥିବା ବଉଳର ପରିମାଣ କମିଯାଇଥିବା ନେଇ କବି ଓ ବିଶେଷଜ୍ଞ ମାନେ କ୍ଷୋଭ ପ୍ରକାଶ କରିଛନ୍ତି ।