କୋରାପୁଟ: ପର୍ଯ୍ୟଟକଙ୍କ ପାଇଁ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି ପୁଞ୍ଜିସିଲ ଜଳପ୍ରପାତ (Punjisil waterfall in Koraput) । ଦାମନଯୋଡିର ପଞ୍ଚପଟ୍ଟମାଳି ପର୍ବତର ପାଦଦେଶରେ ଏହି ଜଳପ୍ରପାତ ବହି ଯାଉଥିବାବେଳେ ଏହାର ବେଶ ମଜା ନେଉଛନ୍ତି ପର୍ଯ୍ୟଟକ । କିଏ ସେଲଫି ଉଠାଉଛି ତ ପୁଣି କିଏ ସ୍ନାନ କରୁଛି । ଲାଗୁଛି ଯେମିତି ପ୍ରକୃତି କୋଳରେ ହସୁଛି ପାହାଡ ଓ ଝରଣା । ଆଉ ପ୍ରକୃତିର ଏହି ସୌନ୍ଦର୍ଯ୍ୟକୁ ମନଭରି ଉପଭୋଗ କରୁଛନ୍ତି ପର୍ଯ୍ୟଟକ । ଶୀତ ଋତୁ ଆସିଲେ ମନେ ପଡେ ଏହି ଜଳପ୍ରପାତ କଥା । ବଣଭୋଜି ହେଉ ବା ପ୍ରକୃତିର ମଜା ନେବାକୁ ଏଠାରେ ପର୍ଯ୍ୟଟକଙ୍କ ସୁଅ ଛୁଟେ । ଜିଲ୍ଲାର ଦଶମନ୍ତପୁର ବ୍ଲକ ମୁଜାଙ୍ଗ ପଞ୍ଚାୟତ ଅନ୍ତର୍ଗତ ପୁଞ୍ଜିସିଲ ଠାରେ ଏହି ଜଳପ୍ରପାତ ରହିଛି ।
ମହାମାରୀ କୋରୋନା ଓ ଓମିକ୍ରନ ଯୋଗୁଁ ଚଳିତ ବର୍ଷ ବଣଭୋଜି ଉପରେ କଟକଣା ଲାଗିବା ସତ୍ବେ ମଧ୍ୟ ଏହି ଜଳପ୍ରପାତଙ୍କୁ ପର୍ଯ୍ୟଟକମାନେ ବୁଲିବାକୁ ଆସୁଛନ୍ତି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ କମ ସଂଖ୍ୟକ ପର୍ଯ୍ୟଟକ ଏହି ସ୍ଥାନକୁ ଆସିଛନ୍ତି । ପଥର ଉପରେ ବହିଯାଇଥିବା ଜଳରାଶି ଉପରଦେଇ ଜଳପ୍ରପାତର ତଳିଆ ଭାଗ ପର୍ଯ୍ୟନ୍ତ ଖସି ଆସିବାର ଆନନ୍ଦକୁ ସାଉଁଣ୍ଟୁଛନ୍ତି ପର୍ଯ୍ୟଟକ । ତେବେ ଏହି ଜଳପ୍ରପାତର ଚତୁଃପାର୍ଶ୍ବ ଏବେ ଅପରିଷ୍କାର ହୋଇପଡି ରହିଛି (Punjisil waterfall being polluted) । ଏଥି ସହିତ ସବୁଠି ପଲିଥିନ, ଅଇଁଠା ଖଲି ଓ ଭଙ୍ଗା ମଦ ବୋତଲ ପଡିଥିବାରୁ ଏହା ପର୍ଯ୍ୟଟକଙ୍କୁ ଦୁଃଖ ଦେଉଛି । ତେବେ ଏଠାରେ ରାନ୍ଧିବା ପାଇଁ ତିଆରି ହୋଇଥିବା ପିଣ୍ଡିକୁ ରାସ୍ତାର ଅଭାବ ସାଙ୍ଗକୁ ନିର୍ମିତ ହୋଇଥିବା ଶୌଚାଳୟ ବନ୍ଦ ପଡିଥିବା ପର୍ଯ୍ୟଟକଙ୍କୁ ଆଶ୍ଚର୍ଯ୍ୟ କରିଛି ।