କୋରାପୁଟ: କୋରୋନା କଷ୍ଟରୁ ବଳି ଗଲାଣି ଜଳ ସଙ୍କଟ । ତୃଷ୍ଣା ମେଣ୍ଟାଇବାକୁ ହେଲେ ଆଙ୍କା ବଙ୍କା, ଉଠାଣୀ ଗଡାଣୀ ପାହାଡିଆ ଜଙ୍ଗଲିଆ ରାସ୍ତା ଦେଇ ଗତି କରିବାକୁ ପଡୁଛି । ଆଉ ଏପରି କରିବାକୁ ବାଧ୍ୟ ହେଉଛନ୍ତି ଗ୍ରାମବାସୀ । କାରଣ ଅଞ୍ଚଳରେ ରହିଛି ଜଳର ଘୋର ଅଭାବ । ଗୋଟେ ପଟେ ଲକଡାଉନରେ ସମସ୍ତେ ଘର ଭିତରେ ବନ୍ଦି ଥିବାବେଳେ ଏହି ଆଦିବାସୀ ଲୋକ କିନ୍ତୁ ପାଣି ପାଇଁ ଘରୁ ବାହାରକୁ ଗୋଡ କାଢୁଛନ୍ତି । ଏ ହେଉଛି କୋରାପୁଟର ଡଙ୍ଗରି ମାଳିଗୁଡା ଗାଁର ଦୃଶ୍ୟ ।
ଡଙ୍ଗରି ମାଳିଗୁଡାର ଜଳ ଯନ୍ତ୍ରଣା, ଝରଣା ଧାର ମେଣ୍ଟାଉଛି ଶୋଷ
ଗାଁରେ ଥିବା କିଛି କୂଅରୁ ବିଲକୁଲ ପାଣି ଆସୁନି ତ ଆଉ ଯେଉଁ କୂଅରୁ ପାଣି ବାହାରୁଛି ତାକୁ ପାଟିରେ ଦେଇ ହଉନି । ସେପଟେ ଜମିରେ ପାଣି ମଡାଇବାକୁ ସରକାର ଯେଉଁ କୂଅ ଖୋଳି ଥିଲେ ସେଥିରେ ପାଣି କମ କାଦୁଅ ବେଶି । ବହୁ ଚେଷ୍ଟା ପରେ ଚାଷ ଜମିର ତଳଭାଗରେ ଲୁଚିହଜି ଯାଇଥିବା ଏକ ଛୋଟ ଝରଣା ଖୋଜି ପାଇଛନ୍ତି ଗାଁ ଲୋକେ । ଦିନ ତମାମ ଗାଁର ମହିଳାମାନେ ସେଠାକୁ ଯାଇ ଜଳଧାରାରୁ ପାଣି ସଂଗ୍ରହ କରୁଛନ୍ତି । ଆଉ ସେ ଜଳଧାରା ଅବସ୍ଥା ବି ଅତି ଦୟନୀୟ ।