କୋରାପୁଟ: କୋରାପୁଟ ଓ ଜୟପୁର ମଧ୍ୟରେ ଜାତୀୟ ରାଜପଥ କଡ଼ରେ ପାହାଡ଼ ଟାପୁରେ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ହୋଇଛି ଦେବିଘାଟ ଉଚ୍ଚବିଦ୍ୟାଳୟ । ରାସ୍ତା ନଥିବା ପାହାଡ଼ ଟାପୁ ଉପରେ ଶିକ୍ଷାନୁଷ୍ଠାନ ନିର୍ମାଣ କରିବା ପାଇଁ ସରକାରଙ୍କ ଦ୍ଵାରା ଅଜସ୍ର ଅର୍ଥ ବ୍ୟୟ କରାଯାଇଛି । ତେବେ ଦୂରଦୃଷ୍ଟି ଅଭାବରୁ ନିର୍ମିତ ଏହି ଭବନକୁ ରାସ୍ତା ଓ ବିଜୁଳି ନଥିବା ଯୋଗୁଁ ଦୀର୍ଘଦିନ ହେଲା ଏହା ପରିତ୍ୟକ୍ତ ହୋଇପଡ଼ିରହିଛି ।
ଅବହେଳିତ ଦେବିଘାଟ ଉଚ୍ଚବିଦ୍ୟାଳୟ: ନାହିଁ ରାସ୍ତା, ନାହିଁ ଖେଳପଡ଼ିଆ ଦେବୀଘାଟ ଗ୍ରାମ ମଧ୍ୟରେ ଥିବା ମୂଳ ବିଦ୍ୟାଳୟ ଭବନରେ ଶ୍ରେଣୀଗୃହ ଅଭାବ ହେବାରୁ ଚଳିତ ବର୍ଷ ଆରମ୍ଭରୁ ପାହାଡ ଟାପୁରେ ଥିବା ଏହି ନୂତନ ସ୍କୁଲ ଭବନରେ ଅଷ୍ଟମରୁ ଦଶମ ଶ୍ରେଣୀର ପିଲାଙ୍କୁ ନେଇ ପାଠପଢା ଆରମ୍ଭ କରାଯାଇଛି । କିନ୍ତୁ ପାହାଡ଼ ମଥାରେ ପ୍ରତିଷ୍ଠିତ ଏହି ଶିକ୍ଷାନୁଷ୍ଠାନକୁ ପହଞ୍ଚିବା ପାଇଁ ରାସ୍ତା ନଥିବା ଯୋଗୁଁ ବହୁ ଅସୁବିଧାର ସମ୍ମୁଖୀନ ହେଉଥିବା ଛାତ୍ରଛାତ୍ରୀ ଅଭିଯୋଗ କରିଛନ୍ତି ।
କୋରାପୁଟ ବ୍ଲକ ଦେଓଘାଟି ଗ୍ରାମର ପିଲାଙ୍କ ଶିକ୍ଷାର ଉନ୍ନତି ପାଇଁ ୧୯୭୫ ମସିହାରେ ପ୍ରାଥମିକ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା । କୋରାପୁଟ ସହରଠାରୁ ପ୍ରାୟ ୮ରୁ ୧୦ କିମି ଦୂରରେ ଥିବାବେଳେ ପିଲାଙ୍କ ଉଚ୍ଚଶିକ୍ଷା ଓ ଭବିଷ୍ୟତ ଦୃଷ୍ଟିରୁ ୨୦୧୫ ମସିହାରେ ଏହି ବିଦ୍ୟାଳୟ ଉନ୍ନୀତ ଉଚ୍ଚବିଦ୍ୟାଳୟର ମାନ୍ୟତା ମଧ୍ୟ ପାଇଛି । ନବମରୁ ଦଶମ ଶ୍ରେଣୀ ମଧ୍ୟରେ ୩୩ ପୁଅ ଓ ୩୭ ଝିଅ ପାଠ ପଢ଼ୁଛନ୍ତି । ବିଦ୍ୟାଳୟରେ ମୋଟ ୭ଜଣ ଶିକ୍ଷକ କାର୍ଯ୍ୟରତ ଥିବା ବେଳେ ସେମାନଙ୍କ ମଧ୍ୟରୁ ତିନିଜଣ ଡେପୁଟେସନରେ ଅଛନ୍ତି । ଅଷ୍ଟମରୁ ଦଶମ ଶ୍ରେଣୀ ପର୍ଯ୍ୟନ୍ତ ପିଲାଙ୍କୁ ପଢ଼ାଇବା ପାଇଁ ସ୍ଥାୟୀ ଶିକ୍ଷକଙ୍କୁ ନିଯୁକ୍ତି ଦିଆଯାଇନାହିଁ କି ଶିକ୍ଷାନୁଷ୍ଠାନରେ ସ୍ଥାୟୀ ପ୍ରଧାନଶିକ୍ଷକଙ୍କୁ ନିଯୁକ୍ତି ଦିଆଯାଇ ନ ଥିବାରୁ କାମଚଳା ନୀତିରେ ଚାଲିଛି ଏହି ଶିକ୍ଷାନୁଷ୍ଠାନ ।
ତେଣୁ ଏହି ବିଦ୍ୟାଳୟକୁ ରାସ୍ତା, ବିଜୁଳି, କମ୍ପ୍ୟୁଟର ଯୋଗାଇବା ସହ ସ୍ଥାୟୀ ଶିକ୍ଷକ ନିଯୁକ୍ତ କରିବା ପାଇଁ ଛାତ୍ରଛାତ୍ରୀ ଦାବି କରିଛନ୍ତି । ତେବେ ରାସ୍ତା ନିର୍ମାଣ ପାଇଁ ବିଡ଼ିଓଙ୍କୁ ଅବଗତ କରାଯାଇଥିବା ବେଳେ ବିଜୁଳି ସଂଯୋଗ କରିବା ପାଇଁ ବିଦ୍ୟାଳୟ ପ୍ରଧାନ ଶିକ୍ଷୟିତ୍ରୀଙ୍କୁ ଅନୁମତି ପ୍ରଦାନ କରାଯାଇଛି ବୋଲି ଜିଲ୍ଲା ଶିକ୍ଷାଧିକାରୀ ରାମଚନ୍ଦ୍ର ନାହାକ ସୂଚନା ପ୍ରଦାନ କରିଛନ୍ତି ।
ଇଟିଭି ଭାରତ, କୋରାପୁଟ
