ହାଇଦ୍ରାବାଦ: ବିଶ୍ବର ସର୍ବବୃହତ ଫିଲ୍ମ ସିଟି ରାମୋଜୀରେ ଲାଗିଲା କୋରାପୁଟର ଜଙ୍ଗଲି ବୃକ୍ଷ । ପ୍ରକୃତିପ୍ରେମୀ ତଥା କୋରାପୁଟର ଟ୍ରି ମ୍ୟାନ ଭାବେ ପରିଚିତ ରବୀନ୍ଦ୍ର କୁମାର ରଣା ଆଜି(ଶୁକ୍ରବାର) ହାଇଦ୍ରାବାଦ ସ୍ଥିତ ରାମୋଜୀ ଫିଲ୍ମ ସିଟିକୁ ଆସି ନିଜ ସାଙ୍ଗରେ ଆଣିଥିବା ୨୦୦ରୁ ଊର୍ଦ୍ଧ୍ବ ବୃକ୍ଷ ଚାରା ରୋପଣ କରିଛନ୍ତି । ଅଳାଁ, ଅର୍ଜୁନ, ବାହାଡ଼ା, ଜାମୁକୋଳି, କରଞ୍ଜ, କୁମ୍ଭୀ, ନିମ୍ବ, ପାହାଡ଼ି, ଶିଶୁ, ପଣସ, ରକ୍ତ ଚନ୍ଦନ ଓ ତେନ୍ତୁଳି ପ୍ରଭୃତି ଗଛ ଲଗାଇଛନ୍ତି । ଏହି ବୃକ୍ଷରୋପଣ କାର୍ଯ୍ୟକ୍ରମରେ ରାମୋଜୀ ଫିଲ୍ମ ସିଟି ଉଦ୍ୟାନ କୃଷି ବିଭାଗର ଉପସଭାପତି ଡକ୍ଟର ରବିଚନ୍ଦ୍ର ଶେଖର ସାମିଲ ହୋଇଥିଲେ ।
କୋରାପୁଟର ଜଙ୍ଗଲି ବୃକ୍ଷରୋପଣ କରି ଜୈବ ବିବିଧତା ସଂରକ୍ଷଣର ବାର୍ତ୍ତା ପହଞ୍ଚାଇବା ପ୍ରକୃତିପ୍ରେମୀ ରବୀନ୍ଦ୍ର ରଣାଙ୍କ ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ । ଫିଲ୍ମି ସିଟିରେ ବୃକ୍ଷରୋପଣ କରିବାର ସୁଯୋଗ ପାଇ ଖୁବ୍ ଖୁସି ଅନୁଭବ କରୁଥିବା ରବୀନ୍ଦ୍ର କହିଛନ୍ତି ଏବଂ ଏହି ଅବସର ପ୍ରଦାନ କରିଥିବାରୁ ରାମୋଜୀ ଗ୍ରୁପର ଚେୟାରମ୍ୟାନ ରାମୋଜୀ ରାଓଙ୍କୁ ଅଶେଷ କୃତଜ୍ଞତା ଜଣାଇଛନ୍ତି । ତେବେ ରାମୋଜୀ ଫିଲ୍ମ ସିଟିରେ ବୃକ୍ଷରୋପଣ ସହିତ ଟଲିଉଡ ସୁପରଷ୍ଟାର ଅଲ୍ଲୁ ଅର୍ଜୁନଙ୍କୁ ଭେଟି କାଠରେ ନିର୍ମିତ ମହାପ୍ରଭୁ ଶ୍ରୀଜଗନ୍ନାଥଙ୍କ ଏକ ଦାରୁବ୍ରହ୍ମ ପ୍ରତିମୂର୍ତ୍ତି ଉପହାର ଦେବାକୁ ମଧ୍ୟ ସେ ଇଚ୍ଛା ରଖିଛନ୍ତି ।