ଉପାନ୍ତ ଅଞ୍ଚଳର ଝିଅ ନମିତାଙ୍କ କଣ୍ଠରେ କୋରୋନା ସଚେତନତା

ମନଛୁଆଁ ଗୀତରେ କୋରୋନା ସଚେତନତା ବାର୍ତ୍ତା ବାଣ୍ଟୁଛନ୍ତି ଉପାନ୍ତ ଅଞ୍ଚଳର ଝିଅ ନମିତା ମେଲେକା ।

କୋରାପୁଟ: ମନଛୁଆଁ ଗୀତରେ କୋରୋନା ସଚେତନତା ବାର୍ତ୍ତା ବାଣ୍ଟୁଛନ୍ତି ଉପାନ୍ତ ଅଞ୍ଚଳର ଝିଅ ନମିତା ମେଲେକା । ଆଦିବାସୀ ଭାଷାରେ ବିଶ୍ବରେ ଆତଙ୍କ ଖେଳାଇଥିବା ମହାମାରୀ କୋରୋନା ପାଇଁ କୌଣସି ଔଷଧ କିମ୍ବା ଟୀକା ଉପଲବ୍ଧ ହୋଇନାହିଁ । ଫଳରେ ଏହି ଅଦୃଶ୍ୟ ଭୁତାଣୁ ସଂକ୍ରମଣରୁ ବର୍ତ୍ତିବାକୁ ସଚେତନତା ହିଁ ଏକମାତ୍ର ବିକଳ୍ପ ରହିଛି ।

ସେଥିପାଇଁ ସଚେତନତା ସୃଷ୍ଟି କରିବା ପାଇଁ ଆଦିବାସୀ ଭାଷାରେ ଗୀତ ରଚନା କରି ତାକୁ ସ୍ୱର ଦେବା ସହ ସୁମଧୁର କଣ୍ଠରେ ସର୍ବତ୍ର ପରିବେଷଣ କରି କୋରାପୁଟ ଜିଲ୍ଲା ବନ୍ଧୁଗାଁ ଅଞ୍ଚଳର ନମିତା ଚର୍ଚ୍ଚାରେ ରହିଛନ୍ତି ।

ବନ୍ଧୁଗାଁ ବ୍ଲକର ଚିନ୍ତାଗୁଡା ଗ୍ରାମର ଦଶମ ଶ୍ରେଣୀର ଛାତ୍ରୀ ନମିତା, ନିଜ ବିଦ୍ୟାଳୟରୁ ଆରମ୍ଭ କରି ସରଗିଫୁଲ ଭଳି ରାଜ୍ୟସ୍ତରୀୟ ମଞ୍ଚରେ ନିଜ ସଙ୍ଗୀତ କଳାର ପ୍ରତିଭାକୁ ପ୍ରମାଣିତ କରିଛନ୍ତି । ଏକାଧିକବାର ପୁରସ୍କୃତ ତଥା ପ୍ରଶଂସିତ ହୋଇଛନ୍ତି ।

ଆଗକୁ ସଙ୍ଗୀତ ମହାବିଦ୍ୟାଳୟରେ ପଢ଼ିବାର ପ୍ରବଳ ଇଛା ରଖିଥିଲେ ହେଁ ସରକାରଙ୍କ ବିନା ସହଯୋଗରେ ଗରିବ ଘରର ଝିଅ ତାର ସ୍ଵପ୍ନକୁ ସାକାର କରିପାରିବ ନାହିଁ ବୋଲି ନମିତାଙ୍କ ବାପା ଚନ୍ଦନ ମେଲେକା କହିଛନ୍ତି ।

କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ