କୋରାପୁଟ: ସୁନେଲି କିରଣରେ ଖିଲିଖିଲି ହସିଉଠୁଛି ସୂର୍ଯ୍ୟମୁଖୀ କ୍ଷେତ । ପାଖୁଡ଼ା ମେଲାଇ ନିଜ ଅପରୂପ ସୌନ୍ଦର୍ଯ୍ୟରେ ଦେଖଣାହାରିଙ୍କୁ ବିଭୋର କରୁଛି । ପ୍ରାକୃତିକ ସୌନ୍ଦର୍ଯ୍ୟର ଗନ୍ତାଘର ବୋଲାଉଥିବା କୋରାପୁଟ ପାହାଡ଼ର ପାଦଦେଶରେ ସୂର୍ଯ୍ୟମୁଖୀର ଆସର ଅତ୍ୟନ୍ତ ମନଲୋଭା । ଟାଙ୍ଗରା ଭୂମିରେ ଥିବା ବିଭିନ୍ନ ପ୍ରକାରର ଫଳ ଓ ଫୁଲକ ସମ୍ଭାର ପର୍ଯ୍ୟଟକଙ୍କୁ ଆକୃଷ୍ଟ କରୁଛି । ଦଶମନ୍ତପୁର ବ୍ଲକ ଅନ୍ତର୍ଗତ ଉପର ନାରଙ୍ଗାରେ ତାପସ ରାୟ ବିଭିନ୍ନ ପ୍ରକାର ଫସଲ କରିବାରେ ସଫଳ ହୋଇଛନ୍ତି ।
ନାରଙ୍ଗା ମୁଖ୍ୟ ରାସ୍ତାରୁ ଅଙ୍କାବଙ୍କା ହୀଡ ଉପର ଦେଇ ଚାଲି ଚାଲିଗଲେ ପାହାଡର ପାଦଦେଶରେ ଥିବା ଏକ ବିସ୍ତୀର୍ଣ୍ଣ ପ୍ରାନ୍ତରରେ ହସୁଛି ନାନାଦି ଫୁଲଫଳ । ଋତୁ ଅନୁକୂଳ ଅନୁଯାୟୀ ମାଣ୍ଡିଆ, ସୁଆଁ, ଅନ୍ୟାନ୍ୟ ଅଣୁ ଜାତୀୟ ଶସ୍ୟ ସମେତ ପିଜୁଳି, କଦଳୀ, ସେଓ, ସାପେଟା, କମଳା, ଲେମ୍ବୁ ଭଳି ଫଳ ଚାଷ ହେଉଛି । ଗତ ପାଞ୍ଚରୁ ଛଅ ବର୍ଷ ଧରି ତାପସ ରାୟ ଏଠାରେ ଚାଷ କରିଆସୁଛନ୍ତି । ଚାଷ ବ୍ୟତୀତ ଛାତ୍ରଛାତ୍ରୀଙ୍କ ପାଇଁ ଏକ ପ୍ରକାର ଗବେଷଣା କେନ୍ଦ୍ର ପାଲଟିଛି । ମାଣ୍ଡିଆର ପ୍ରଚାର ପ୍ରସାର ନିମନ୍ତେ ରାଜ୍ୟ ସରକାର ଅନେକ ପଦକ୍ଷେପ ନେଉଛନ୍ତି । ଏଥର ଅନ୍ତର୍ଜାତୀୟ ମିଲେଟ ବର୍ଷ ଭାବେ ପାଳନ କରୁଛି ସମଗ୍ର ବିଶ୍ବ । ଏହି କ୍ରମରେ ଯୁବ କୃଷି ଅଧିକାରୀ ତାପସ ରାୟ ଉପର ନାରଙ୍ଗାରେ ରାଜ୍ୟର ପ୍ରଥମ ଗ୍ରାମୀଣ ମିଲେଟ ସ୍କୁଲ ସ୍ଥାପନା କରିବା ଦିଗରେ ଦ୍ରୁତ ପଦକ୍ଷେପ ନେବାକୁ ଯାଉଛନ୍ତି । ଅନୌପଚାରିକ ଭାବେ ଚାଷୀଙ୍କ ବୌଦ୍ଧିକ ଚେତନାକୁ ପ୍ରଭାବିତ କରୁଥିବା ଏହି ଜମିରେ ଥିବା ସମ୍ଭାବନାକୁ ପରିଲକ୍ଷିତ କରି ସେ ଏହି ପଦକ୍ଷେପ ନେଇଥିବା କହିଛନ୍ତି ।