ଅଦା ଓ ପନିପରିବା ଆଚାର କରି ଲାଭବାନ ହେବେ ଚାଷୀ

କୋରାପୁଟ ଜିଲ୍ଲା ପ୍ରଶାସନ, ଓରମାସ ଓ ଓଡିଶା ଜୀବିକା ମିଶନର ମିଳିତ ଆନୁକୂଲ୍ୟରେ ଗେଲାଗୁଡା ଗ୍ରାମରେ ଗଢି ଉଠିଥିବା ମହିଳା ଉତ୍ପାଦକ ଦଳର ସଦସ୍ୟଙ୍କୁ ବିଭିନ୍ନ ପନିପରିବା ଓ ବିଶେଷ କରି ଅଦାରୁ ଉନ୍ନତ ମାନର ଆଚାର ପ୍ରସ୍ତୁତ କରିବାର ତାଲିମ ପ୍ରଦାନ କରାଯାଇଛି ।

କୋରାପୁଟ: ଜିଲ୍ଲାର କୁନ୍ଦୁଲି, ଦକ୍ଷିଣ ଓଡ଼ିଶାର ସର୍ବବୃହତ ପରିବା ହାଟ ଭାବେ ଖ୍ୟାତି ଅର୍ଜନ କରିଥିଲେ ହେଁ ଅନେକ ସମୟରେ ପନିପରିବାର ଉଚିତ ମୂଲ୍ୟ ମିଳୁ ନଥିବା ଅଭିଯୋଗ ହୋଇ ଆସୁଛି । ଏହି ହାଟ ଚତୁଃପାର୍ଶ୍ଵରେ ଥିବା ଗାଁ ଗଣ୍ଡାରେ ଵିନ୍ସ , ଗାଜର , ଫୁଲକୋବି ଓ ବିଶେଷ କରି ଅଦା ବହୁଳ ଭାବେ ଉତ୍ପାଦିତ ହୁଏ । କିନ୍ତୁ ଶୀତଳଭଣ୍ଡାର ଅଭାବ ଯୋଗୁଁ ଚାଷୀ ନିଜ ଉତ୍ପାଦକୁ କମ ଦାମରେ ମଧ୍ୟ ବିକ୍ରି କରିବା ପାଇଁ ବାଧ୍ୟ ହୋଇଥାନ୍ତି ।

ତେବେ କୋରାପୁଟ ଜିଲ୍ଲା ପ୍ରଶାସନ, ଓରମାସ ଓ ଓଡିଶା ଜୀବିକା ମିଶନର ମିଳିତ ଆନୁକୂଲ୍ୟରେ ଗେଲାଗୁଡା ଗ୍ରାମରେ ଗଢି ଉଠିଥିବା ମହିଳା ଉତ୍ପାଦକ ଦଳର ସଦସ୍ୟଙ୍କୁ ବିଭିନ୍ନ ପନିପରିବା ଓ ବିଶେଷ କରି ଅଦାରୁ ଉନ୍ନତ ମାନର ଆଚାର ପ୍ରସ୍ତୁତ କରିବାର ତାଲିମ ପ୍ରଦାନ କରାଯାଇଛି ।

ଏହା ଫଳରେ ଚାଷୀ ପକ୍ଷରେ ନିଜ ଉତ୍ପାଦର ଉଚିତ ମୂଲ୍ୟ ପାଇବା ସମ୍ଭବ ହୋଇପାରିବ ବୋଲି ଓରମାସର ଜିଲ୍ଲାଧିକାରୀ ରୋଶନ କାର୍ତିକ ଜଣାଇଛନ୍ତି । ଏହି ତାଲିମ ପାଇବା ପରେ ନିଜେ ନିଜେ ଆଚାର ପ୍ରସ୍ତୁତ କରି ବଜାରରେ ଉପସ୍ଥିତିକୁ ଜାହିର କରିବା ନେଇ ମହିଳା ଚାଷୀ ଉତ୍ସାହିତ ଅଛନ୍ତି । ଏନେଇ ତାଲିମଦାତା ଶ୍ବେତା ଖଜୁର ମହିଳା ମାନେ ସକ୍ରିୟ ଭାବେ ତାଲିମ ଗ୍ରହଣ କରିଥିବା ଯୋଗୁଁ ସେମାନଙ୍କ ସ୍ବପ୍ନ ସାକାର ହେବା ସୁନିଶ୍ଚିତ ବୋଲି ମତ ରଖିଛନ୍ତି ।

କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ