କୋରାପୁଟ: ଦେହମୁଣ୍ଡରେ କଞ୍ଚା ପତ୍ରକୁ ବାନ୍ଧି ,ଗାଁ ପାଖ ଝରଣାରୁ କଙ୍କଡା ଧରି ପିଲାଏ ପାଳୁଛନ୍ତି ଆଦିବାସୀଙ୍କ ବଡ ଉତ୍ସବ ଚୈତ୍ର ପର୍ବ । ବର୍ଷର ଏହି ସମୟଟି କୋରାପୁଟର ଆଦିବାସୀଙ୍କ ପାଇଁ ଏକ ମହାଆନନ୍ଦର ବେଳା ହୋଇଥିବା ବେଳେ ଆଜି ଗାଁର ପବିତ୍ର ନିଶାଣିମୁଣ୍ଡା ମଧ୍ୟ ନିରବ ହୋଇଯାଇଛି ।
ଚୈତ୍ର ପର୍ବସମୟରେ ଘରେ ଘରେ ପୂଜା ପାର୍ବଣ ହୋଇ , ଦିନରାତି ଏକ କରିଦେଉଥିବା ସାଇଲୋଡି ନୃତ୍ୟରେ ଝୁମି ଉଠିବାର ପରମ୍ପରା ଥିବା ବେଳେ ପ୍ରଶାସନ ତରଫରୁ ଲଗାଯାଇଥିବା କୋରୋନା ଲକଡାଉନ ଯୋଗୁଁ ବାଜ ଟିଏବି ନବାଜୁଣୁ ଘରେ ନୀରବରେ ପୂଜା ଅନୁଷ୍ଠିତ ହୋଇଯାଇଛି । ବେଣ୍ଟ ଯାତ୍ରାରେ ଅସ୍ତ୍ର ଶସ୍ତ୍ର ସହିତ ସାମୁହିକ ଭାବେ ଜଙ୍ଗଲକୁ ଯିବା ଚୈତ୍ର ପରବର ମୁଖ୍ୟ ଆକର୍ଷଣ । କିନ୍ତୁ ତାହାବି ବାଧା ପ୍ରାପ୍ତ ହୋଇଥିବା ଯୋଗୁଁ ଯୁବଗୋଷ୍ଠୀକୁ ମାନସିକ ଭାବେ ଶକ୍ତ ଆଘାତ ଲାଗିଥିବା ପରଜା ସମାଜର ସଭାପତି ମଦନ କିରସାନି ଜଣାଇଛନ୍ତି । ତେବେ ଜିଲ୍ଲାରେ ସାମାଜିକ ଦୁରତ୍ବକୁ ବଳବତ୍ତର କରିଥିବା ଯୋଗୁଁ କୌଣସି ସାମୁହିକ ଉପସ୍ଥିତିରେ ପର୍ବ ପାଳନକୁ ଅନୁମତି ଦିଆଯିବ ନାହିଁ ବୋଲି ଜିଲ୍ଲାପାଳ ମଧୁସୂଦନ ମିଶ୍ର ଜଣାଇଛନ୍ତି ।