କୋରାପୁଟ: ଏକର ଏକର ଚାଷ ଜମିରେ ନଷ୍ଟ ହେଉଛି ପରିବା । କେଉଁଠି ଶାଗ ଗଛରେ ଫୁଲ ଧରିଲାଣି ତ ପୁଣି କେଉଁଠି ବାଇଗଣ, ଗଛରେ ରହି ପାଚିଗଲାଣି । ଟମାଟୋ ତ ମାଟିରେ ପଡି ପଚିଯାଉଛି । ଆଉ ଗେଣ୍ଡୁଫୁଲ ବି ଗଛରେ ରହି ଝଡିଗଲାଣି । ଏ ହେଉଛି କୋରାପୁଟ ପିଣ୍ଡିକି ମାଳିଗୁଡାର ଏକର ଏକର ଧରି ବିଭିନ୍ନ ପନିପରିବା ଚାଷ ହୋଇଥିବା ଚାଷ ଜମିର କଥା । କୋରୋନା ମୁକାବିଲା ଲାଗି ସାରା ଦେଶ ଲକ୍ଡାଉନ୍ ହୋଇଥିବାବେଳେ କୋରାପୁଟରେ ବଜାର ମାତ୍ର 4 ଘଣ୍ଟା ଖୋଲୁଛି । ସେପଟେ ଗାଡିମୋଟର ଚାଲୁନଥିବାରୁ ପରିବାଗୁଡିକୁ ବଜାରରେ ପହଞ୍ଚାଇବାକୁ ନାକେଦମ୍ ହେବାକୁ ପଡୁଛି ।
କୋରାପୁଟରେ କୋରୋନା କଷ୍ଟ, ଆଖି ଆଗରେ ଉଜୁଡୁଛି ପନିପରିବା ଚାଷ
ସେଥିରେ ପୁଣି ପ୍ରଶାସନର କଟକଣା ମାନିବାକୁ ପଡୁଥିବାରୁ ପରିବାକୁ ଦରଅଦରରେ ବିକ୍ରି କରୁଛି ଚାଷୀ । ଆଉ ଯାହା ବିକ୍ରି ନହେଉଛି ବୋହିନେବା ଅପେକ୍ଷା ସେଠାରେ ହିଁ ଫିଙ୍ଗିଦେଉଥିବା ଦେଖିବାକୁ ମିଳୁଛି । ଖାଲି ପନିପରିବା ନୁହେଁ, ଫଳ ବ୍ୟବସାୟୀଙ୍କର ବି ସମାନ ସ୍ଥିତି । ସେଓ, ଅଙ୍ଗୁର, ବେଦନା ଆଦି ଫଳ ବିକ୍ରି ହୋଇନପାରି ପଚିଯାଉଛି ।