କୋରାପୁଟ: ମଙ୍ଗଳବାର ସାରା ଦେଶ ପାଳିଛି ସମ୍ବିଧାନ ଦିବସ । ବିଶ୍ବର ସର୍ବବୃହତ ଲିଖିତ ସମ୍ବିଧାନକୁ ପୂରିଛି 70 ବର୍ଷ । ଏହି ଅବସରରେ କୋରାପୁଟ ଜିଲ୍ଲାରେ ସମ୍ବିଧାନ ଦିବସ ପାଳିତ ହୋଇଛି । ସବୁ ପିଲା ଯେଭଳି ପାଠ ପଢିବାରେ ସକ୍ଷମ ହେବେ ସେ ଦିଗରେ ସହଯୋଗ କରିବାକୁ ଜିଲ୍ଲା ପ୍ରଶାସନର ଅଧିକାରୀ ତଥା କୋରାପୁଟ ଜନସାଧାରଣ ଶପଥ ନେଇଥିଲେ ।
ଜିଲ୍ଲାପାଳ ମଧୂସୂଦନ ମିଶ୍ର ସମସ୍ତଙ୍କୁ ସମ୍ବିଧାନରେ ଦିଆଯାଇଥିବା ବିଭିନ୍ନ ଅଧିକାରକୁ ସକରାତ୍ମକ ଦିଗରେ ଉପଲବ୍ଧି କରିବାକୁ କହିଥିଲେ । ଏହା ସହିତ 11ଟି ପ୍ରମୁଖ ବିଷୟରେ ଉଲ୍ଲେଖ ଥିବା ଦାୟିତ୍ବର ଶପଥ ପାଠ କରାଇଥିଲେ । ତେବେ ଆଜି ପର୍ଯ୍ୟନ୍ତ କୋରାପୁଟ ଭଳି ଆଦିବାସୀ ବହୁଳ ଅଞ୍ଚଳରେ ସାଧାରଣ ଜନତା ସମ୍ବିଧାନରେ ଦିଆଯାଇଥିବା ଅଧିକାର ପାଇବା ଠାରୁ ବଞ୍ଚିତ ହୋଇଛନ୍ତି । ହେଲେ ଆଜି ସାମ୍ବିଧାନିକ ଦିବସ ଅବସରରେ ଶପଥ ନେଇଥିବା ପ୍ରଶାସନିକ ଅଧିକାରୀ ମାନେ ନିଜ ସଂକଳ୍ପକୁ କାର୍ଯ୍ୟରେ ରୂପାନ୍ତରିତ କରିବାର ଆବଶ୍ୟକତା ରହିଛି ବୋଲି କୋରାପୁଟର ପୂର୍ବତନ ଜିଲ୍ଲାପାଳ ଗଦାଧର ପରିଡ଼ା ମତ ରଖିଛନ୍ତି ।
କୋରାପୁଟରୁ ସିଏଚ୍ ଶାନ୍ତାକାର, ଇଟିଭି ଭାରତ