କୋରାପୁଟ: କଟକଣା ଭିତରେ କୋରାପୁଟର ଅନେକ ଚର୍ଚ୍ଚରେ ପାଳନ ହେଲା ବଡଦିନ । ଜିଲ୍ଲାର ବିଭିନ୍ନ ଚର୍ଚ୍ଚରେ କୋଭିଡ଼ ନିୟମ ଅବଲମ୍ବନ କରି ଖ୍ରୀଷ୍ଟମାସ ଉତ୍ସବକୁ ପାଳନ କରିବା ପାଇଁ ଅନୁମତି ମିଳିବା ପରେ ଆଜି (ଶୁକ୍ରବାର) କୋରାପୁଟର ଦୁଇଟି ପ୍ରମୁଖ ଚର୍ଚ୍ଚରେ ଦୁଇଟି ଭିନ୍ନ ଭିନ୍ନ ଢଙ୍ଗରେ ବଡ଼ଦିନ ପାଳିତ ହେବା ଦେଖାଯାଇଛି ।
ସହରର କେନ୍ଦ୍ରସ୍ଥଳୀରେ ଥିବା ଜେଇଏଲସି ଚର୍ଚ୍ଚରେ ଭକ୍ତମାନେ କୋଭିଡ଼ ନିୟମାବଳୀ ଅନୁଯାୟୀ ମାସ୍କ ପିନ୍ଧି ନିୟନ୍ତ୍ରିତ ସଂଖ୍ୟାରେ ଦଳ ଦଳ କରି ଚର୍ଚ୍ଚ ମଧ୍ୟକୁ ଯାଇ ପ୍ରାର୍ଥନା କରିଛନ୍ତି । ସେହିପରି ଓଏସଏପି କଲୋନୀ ନିକଟରେ ଥିବା କ୍ୟାଥଲିକ ଚର୍ଚ୍ଚରେ ମୁଖ୍ୟ ଫାଟକ ସମ୍ପୂର୍ଣ ବନ୍ଦ ରଖାଯାଇ ଭକ୍ତଙ୍କୁ ଫାଟକ ବାହାରେ ଏକ ସ୍ୱତନ୍ତ୍ର ସ୍ଥାନରେ କ୍ୟାଣ୍ଡେଲ ଜଳାଇ ନିଜ ପ୍ରାର୍ଥନାକୁ ଅର୍ପଣ କରିବା ପାଇଁ ବ୍ୟବସ୍ଥା କରାଯାଇଛି । କୋଭିଡ଼ କଟକଣା ବଡ଼ଦିନ ପାଳନକୁ ଅନେକ ମାତ୍ରାରେ ପ୍ରଭାବିତ କରିଦେଇଥିଲେ ହେଁ ଶେଷ ମୁହୂର୍ତ୍ତରେ ଚର୍ଚ୍ଚରେ ପ୍ରାର୍ଥନା କରିବା ପାଇଁ ଅନୁମତି ମିଳିଥିବା ଯୋଗୁଁ ଖ୍ରୀଷ୍ଟାବଲମ୍ବୀଙ୍କ ମନରେ ଆନନ୍ଦ ଖେଳିଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ