ଭାଗବତ ଚେତନାରେ ଉବୁଟୁବୁ ପୁରା ପରିବାର, ଧର୍ମ ପୁସ୍ତକରେ ଭରିଛି ଘର

ପୁରାଣ ସମ୍ବନ୍ଧୀୟ ପୁସ୍ତକ ସଂଗ୍ରହ ଓ ଏହାକୁ ଅଧ୍ୟୟନ କରିବା ତାଙ୍କର ନିଶାରେ ପରିଣତ ହୋଇଛି । ଅର୍ଥାଭାବ ଥିଲେ ମଧ୍ୟ ପୁସ୍ତକ ସଂଗ୍ରହ କରିବାକୁ ସେ କେବେ ବି ଭୁଲନ୍ତି ନାହିଁ । ଅବସର ପରେ ତାଙ୍କର ପୁସ୍ତକ ସଂଗ୍ରହ ଜାରି ରହିଥିବା ବେଳେ ଛୋଟ ଘର ମଧ୍ୟ ଧର୍ମ ପୁସ୍ତକରେ ଭରି ପଡ଼ିଛି କୋରାପୁଟ ଜିଲ୍ଲା କୋଲାବ ନଗରର ପୁରାଣ ପୁସ୍ତକ ପ୍ରେମୀ ବିଷ୍ଣୁ ଚରଣ ସେଠୀଙ୍କ ଘର । ତାଙ୍କ ପୁରା ପରିବାର ଭାଗବତ ଚେତନାରେ ସର୍ବଦା ବୁଡି ରହିଛନ୍ତି । ଏହି ନିଆରା ପରିବାର ଉପରେ ଦେଖନ୍ତୁ ଏହି ରିପୋର୍ଟ

କୋରାପୁଟ: ଜିଲ୍ଲାର କୋଲାବ ନଗରର ପୁରାଣ ପୁସ୍ତକ ପ୍ରେମୀ ବିଷ୍ଣୁ ଚରଣ ସେଠୀ (Mythological Book Lover Bishnu Sethi) । ତାଙ୍କ ପୁରା ପରିବାର ଭାଗବତ ଚେତନାରେ ଉବୁଟୁବୁ । ପୁରାଣ ସମ୍ବନ୍ଧୀୟ ପୁସ୍ତକ ସଂଗ୍ରହ କରିବା ଯେପରି ତାଙ୍କ ନିଶାରେ ପରିଣତ ହୋଇଛି । ଟଙ୍କାଟିଏ ପାଇଲେ ସେ ତାହାକୁ ପ୍ରଥମେ ପୁସ୍ତକ ସଂଗ୍ରହ ପାଇଁ ସଞ୍ଚୟ କରି ରଖନ୍ତି । ଫଳରେ ତାଙ୍କ ଘର ପାଲଟିଛି ବହି ମୟ । ଛୋଟ ଘର ମଧ୍ୟରେ ସ୍ଥାନର ଅଭାବ ଯୋଗୁଁ କେଉଁଠି ପେଟିରେ ତ କେଉଁଠି ଖଟ ତଳେ ଅମୂଲ୍ୟ ସମ୍ପତ୍ତି ସ୍ବରୂପ ବହିକୁ ସାଇତି ରଖିଛନ୍ତି ବିଷ୍ଣୁ ।

ଗତ ୪୦ ବର୍ଷ ପୂର୍ବର କୋଲାବ ଜଳ ବିଦ୍ୟୁତ୍ ଯୋଜନାରେ ଅସ୍ଥାୟୀ କର୍ମଚାରୀ ଭାବେ ୨୦୦ ଟଙ୍କାର ଦରମାରେ ବଞ୍ଚୁଥିବା ସମୟ ହେଉ ବା ବର୍ତ୍ତମାନ ଆଇଆରବି (ଇଣ୍ଡିଆ ରିଜର୍ଭ ବାଟାଲିୟନ)ରୁ ଅବସର ନେବା ପରେ କିଛି ହଜାର ଟଙ୍କାର ପେନସନ । ସେ ସବୁବେଳେ ଖାଇବାଠୁ ପୁସ୍ତକକୁ ଅଧିକ ଗୁରୁତ୍ବ ଦେଇଥାନ୍ତି ।

ଯେତେବେଳେ ବିଷ୍ଣୁଙ୍କ ଧର୍ମ ପତ୍ନୀ ଆଷ୍ପଲତା ନବବଧୂ ସାଜି କୋଲାବ ନଗରର ଛୋଟ ଘରକୁ ଆସିଥିଲେ ସେତେବେଳେ ଏକ ୮୦ ଟଙ୍କାର ପୁସ୍ତକ ପ୍ୟାକେଟକୁ ଡାକଘରୁ ମୁକୁଳାଇବା ଦେଖିବା ପରେ ବିଷ୍ଣୁ ବାବୁଙ୍କ ବହି ନିଶା ସମ୍ପର୍କରେ ଜାଣିବାକୁ ପାଇଥିଲେ । ତେବେ ବିଷ୍ଣୁ ବାବୁଙ୍କ ପୁରାଣ ବହି କିଣିବା ପାଇଁ ଲାଗିଥିବା ଏହି ନିଶାର ପ୍ରତିବନ୍ଧକ ନ ସାଜି ଆଷ୍ପଲତା ମଧ୍ୟ ତାଙ୍କ ଭଳି ପୁସ୍ତକ ପଢିବାର ଅଭ୍ୟାସକୁ ଆପଣାଇ ନେଲେ ।

ଏପରିକି ପତିଙ୍କ ସ୍ୱଳ୍ପ ଆୟରେ ବହି କିଣିବା ପାଇଁ ଅର୍ଥାଭାବ ରହୁଥିବା ଯୋଗୁଁ ସେ ନିଜେ ସିଲେଇ କାମ କରି ଦୁଇ ପଇସା ରୋଜଗାର କରି ପରିବାରର ଆୟ ବୃଦ୍ଧିରେ ସହାୟକ ହୋଇଥିଲେ । ବର୍ତ୍ତମାନ ତାଙ୍କ ଘର ଧର୍ମ ପୁସ୍ତକରେ ଭରି ପଡ଼ିଛି । ଛୋଟ ଘର ଭିତରେ ସ୍ଥାନାଭାବ ଯୋଗୁଁ ବହି ଗୁଡ଼ିକୁ କେଉଁଠି ପେଟିରେ ତ ଆଉ କେଉଁଠି ଖଟ ତଳେ ହଜାର ହଜାର ପୁସ୍ତକ ସାଇତି ରଖିଛନ୍ତି ବିଷ୍ଣୁ ବାବୁ ଓ ତାଙ୍କ ଧର୍ମପତ୍ନୀ ଆଷ୍ପଲତା ।

ନିଜ ସ୍ବାମୀଙ୍କ ଏହି ନିଶାକୁ ନେଇ ପତ୍ନୀ କହିଛନ୍ତି, " ମୋ ସ୍ବାମୀଙ୍କ ପାଇଁ ମୁଁ ବହୁ ଗର୍ବିତ । ଆମ ପରିବାର ସମସ୍ତେ ସର୍ବଦା ପୁରାଣ ଶାସ୍ତ୍ର ସମ୍ପର୍କରେ ଆଲୋଚନା କରିଥାଉ । ଟେଲିଭିଜନରେ ମଧ୍ୟ ପୁରାଣ ସମ୍ବନ୍ଧୀୟ କାର୍ଯ୍ୟ କରିଥାଉ । କେବଳ ଭଗବାନଙ୍କ ସମ୍ପର୍କରେ ଆଲୋଚନା କରିଥାଉ । ଦିନଠୁ ରାତି କେବଳ ଭଗବାନଙ୍କ ସମ୍ପର୍କରେ ଚିନ୍ତା କରିଥାଉ ।"

ବାପା ମାଆଙ୍କ ଏପରି ପୁରାଣ ଓ ଧର୍ମ ପୁସ୍ତକ ପ୍ରତି ଆଗ୍ରହକୁ ଦେଖି ତାଙ୍କ ପୁଅ ମଧ୍ୟ ନିଜ ଦରମାରୁ ପୁସ୍ତକ କିଣିବା ଆରମ୍ଭ କରିଥିବା ବିଷ୍ଣୁ ବାବୁ କହିଛନ୍ତି । ଦିଲ୍ଲୀରେ ଚାକିରୀ କରୁଥିବା ତାଙ୍କ ପୁଅ ଇତିମଧ୍ୟରେ ନିଜେ କିଣିଥିବା ପୁସ୍ତକକୁ ନେଇ ଏକ ବିରାଟ ଲାଇବ୍ରେରୀ କରିସାରିଥିବା ସେଠୀ କହିଛନ୍ତି । ନିଜେ ପଢିବା ସହ ପାଖ ପଡୋଶୀଙ୍କ ମଧ୍ୟରେ ବହି ପଢ଼ିବା ପାଇଁ ପ୍ରେରଣା ଯୋଗାଉଥିବା ବିଷ୍ଣୁ ଚରଣ ସେଠୀଙ୍କ ପରିବାର ବର୍ତ୍ତମାନ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟି ଯାଇଛନ୍ତି ।

ଇଟିଭି ଭାରତ, କୋରାପୁଟ