କୋରାପୁଟ: ଜିଲ୍ଲାର ଅଧିକାଂଶ ଭାଗ ପାହାଡିଆ ଜମି ହୋଇଥିବା ଯୋଗୁଁ କୂଅ, ପୋଖରୀ ଭଳି ଜଳ ଧାରଣ କରୁଥିବା ସ୍ଥଳ ଅଧିକରୁ ଅଧିକ ସୃଷ୍ଟି କରାଗଲେ ଏଠାକାର କ୍ଷୁଦ୍ର ଓ ନାମମାତ୍ର ଚାଷୀ ବର୍ଷରେ ଅନ୍ତତଃ ପକ୍ଷେ ଫସଲ ଉତ୍ପାଦନ କରିପାରନ୍ତା ବୋଲି ଜିଲ୍ଲାରେ ଚାଷ ଓ ଚାଷୀ ର ଉନ୍ନତି ନିମନ୍ତେ କାର୍ଯ୍ୟ କରୁଥିବା ଅଗ୍ରଣୀ ସ୍ବେଛାସେବୀ ସଂଗଠନ ପ୍ରଗତିର ସମ୍ପାଦକ ପ୍ରଭାକର ଅଧିକାରୀ ମତ ରଖିଛନ୍ତି । ନନ୍ଦପୁର ବ୍ଲକର ବିଭିନ୍ନ ଭାଗରେ ସଂସ୍ଥା ପକ୍ଷରୁ ଚାଷୀମାନଙ୍କୁ ସୋଲାର ପମ୍ପ ଓ ଡିବିଆଇ ଯୋଗେ ଜଳଧାରା ପହଞ୍ଚାଇବାରେ ସହାୟକ ହେବା ଫଳରେ ଖରାଦିନରେ ମଧ୍ୟ ଚାଷୀ ବିଭିନ୍ନ ପନିପରିବା ଚାଷ କରିପାରୁଛନ୍ତି ।
ମହାତ୍ମାଗାନ୍ଧୀ ନିଶ୍ଚିତ କର୍ମ ଯୋଜନାରେ ଏହିପରି ଜଳଯୋଗାଣ କାରୀ ପଦକ୍ଷେପ ନେଇ ସ୍ଥାନୀୟ ଚାଷୀଙ୍କୁ ସହଯୋଗ କରିପାରିଲେ ଜିଲ୍ଲାରୁ ଦାଦନ ଖଟିବା ପାଇଁ ଯାଉଥିବା ବ୍ୟକ୍ତିଙ୍କ ସଂଖ୍ୟାରେ ହ୍ରାସ ଘଟିବ ବୋଲି ସେ ଆଶା ପୋଷଣ କରିଛନ୍ତି । ତେବେ ବର୍ତମାନ କୋଭିଡ ଲକଡାଉନ ସାମୟରେ ସ୍ବଗ୍ରାମକୁ ଫେରିଆସୁଥିବା ଶ୍ରମିକଙ୍କୁ ନିଜ ଗାଁ ପାଖରେ କାର୍ଯ୍ୟ ଯୋଗାଇଦେବା ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ପ୍ରୟାସରେ ଏମଜିଏନାର୍ଜୀଏର ବ୍ୟାପକ କାର୍ଯ୍ୟ କରାଯିବାର ଯୋଜନା ଥିବା ଯୋଗୁଁ ଭବିଷ୍ୟତରେ ଲୋକେ ଦାଦନ ଖଟିବାକୁ ଦୂରଦେଶକୁ ଯିବା ଆବଶ୍ୟକ ପଡିବନାହିଁ ବୋଲି ରାଜ୍ୟ ବିହନ ନିଗମର ଅଧ୍ୟକ୍ଷ ଈଶ୍ବର ପାଣିଗ୍ରାହୀ ଜଣାଇଛନ୍ତି । ଏଥି ସହିତ ଶ୍ରମିକମାନଙ୍କୁ ଅତୀତରେ ଏମଜିଏନଆରଇଜିଏ କାର୍ଯ୍ୟ କରିବା ପରେ ବି ପ୍ରାପ୍ୟ ମଜୁରୀ ମିଳିବାରେ ବିଳମ୍ବ ହେଉଥିବା ଅଭିଯୋଗକୁ ଦୃଷ୍ଟିରେ ରଖି ବର୍ତମାନ ସରକାରଙ୍କ ପକ୍ଷରୁ ନୂତନ ବ୍ୟବସ୍ଥା ଅବଲମ୍ବନ କରାଯାଇଛି ଓ ଏହା ଫଳରେ ଶ୍ରମିକଙ୍କୁ ମଜୁରୀ ଠିକ ସମୟରେ ମିଳିବାରେ ସୁବିଧା ହୋଇପାରିବ ବୋଲି ଜିଲ୍ଲାପାଳ ମଧୁସୂଦନ ମିଶ୍ର ଜଣାଇଛନ୍ତି ।