ଖୋର୍ଦ୍ଧା:୭ ବର୍ଷ ତଳେ ପ୍ରେମ ବିବାହ କରିଥିଲେ, ଭୁବନେଶ୍ବରରେ ଏକାଠି ଭଡା ଘରେ ମଧ୍ୟ ରହୁଥିଲେ । କିନ୍ତୁ ହଠାତ ସୁଖରେ ସଂସାରରେ ଆସିଲା ଝଡ । ସ୍ତ୍ରୀ ପିଙ୍କିଙ୍କୁ ଛାଡି ଚାଲିଗଲେ ସ୍ବାମୀ ଅଶୋକ । ଆଉ ଶେଷରେ ସ୍ବାମୀ ଖୋଜି ଖୋଜି ନପାଇବାରୁ ନ୍ୟାୟ ପାଇଁ ଏବେ ଶ୍ବଶୁର ଘର ସମ୍ମୁଖରେ ଧାରଣାରେ ବସିଛନ୍ତି ମହିଳା । ନିଜର ହକ୍ ପାଇଁ ସ୍ବାମୀ ଘର ପିଣ୍ଡାରେ ବସିଛନ୍ତି ସ୍ତ୍ରୀ । ଅଣ ଓସାରିଆ ପିଣ୍ଡାରେ ନିଜେ ରୋଷେଇ ଖାଉବା ସହ ଓ ସେଇଠି ଶୋଉଛନ୍ତି । ଏମିତି ଦୀର୍ଘ ଦୁଇମାସ ଧରି ସ୍ୱାମୀକୁ ପାଇବା ଦାବିରେ ଶାଶୁ ଘର ପିଣ୍ଡାରେ ବସିଛି ବୋହୂ । ଏଭଳି ଘଟଣା ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ବାଘମାରୀ ଥାନା ଅନ୍ତର୍ଗତ ବାଘମାରୀ ଗ୍ରାମରେ ।
ବାଘମାରୀର ଅଶୋକ ଦାଶ ନାମକ ଜଣେ ଯୁବକ ଅନୁଗୋଳର ପିଙ୍କି ବେହେରା ନାମ୍ନୀ ଜଣେ ଯୁବତୀଙ୍କୁ ୭ବର୍ଷ ତଳେ ବାହା ହୋଇ ଭୁବନେଶ୍ଵରରେ ରହୁଥିଲେ । ଗତ ଜୁନ ୧୩ ତାରିଖରୁ ଅଶୋକ ପିଙ୍କିକୁ ଛାଡି କୁଆଡେ ପଳେଇଲା । ସ୍ବାମୀକୁ ନପାଇ ଖାରବେଳ ନଗର ଥାନାରେ ଏତଲା ଦେଇଥିଲା ପିଙ୍କି । କିନ୍ତୁ ନ୍ୟାୟ ପାଇଲେ ନାହିଁ । ଶେଷରେ ଖୋଜି ଖୋଜି ଆସି ଅଶୋକର ଗ୍ରାମ ବାଘମାରୀରେ ପହଞ୍ଚିଥିଲେ । ଏଥିସହ ଗତ ନଭେମ୍ବର ମାସ 26 ତାରିଖରୁ ସ୍ୱାମୀ ଘର ଆଗରେ ଧାରଣାରେ ବସିଛନ୍ତି ।
ସେହିପରି ପିଙ୍କି ଜାତିକୁ ନେଇ ଶାଶୂଘର ଲୋକ ଗ୍ରହଣ କରୁନଥିବା ଅଭିଯୋଗ କରୁଛନ୍ତି ପିଙ୍କି । ସହିବାର ସବୁ ସୀମା ଟପି ସାରିଥିବା କହିଛନ୍ତି । ଯାହାକୁ ଭରସା କରି ବିବାହ କରିଥିଲି ସେ ଆଜି ମତେ ଦାଣ୍ଡରେ ବସାଇଛି, ଆଉ ମୋର କେହି ନାହାନ୍ତି,ମୁଁ କୁଆଡେ ଯିବି ବୋଲି ପ୍ରଶ୍ନ କରିଛନ୍ତି ପିଙ୍କି । ସେହିପରି ଭୁବନେଶ୍ୱର ଡିସିପି, ଖୋର୍ଦ୍ଧା ଏସ୍ପି ସମସ୍ତଙ୍କୁ ଜଣାଇ ମଧ୍ୟ ମୁଁ ନ୍ୟାୟ ପାଇନି ବୋଲି କୋହଭରା କଣ୍ଠରେ କହିଛନ୍ତି ।