ଭୁବନେଶ୍ବର: ରାଜଧାନୀ ଭୁବନେଶ୍ବର ସେଗମେଣ୍ଟରେ ଅନ୍ୟତମ ଗୁରୁତ୍ବପୂର୍ଣ୍ଣ ବିଧାନସଭା ନିର୍ବାଚନ ମଣ୍ଡଳୀ ଭୁବନେଶ୍ବର-ମଧ୍ୟ ଆସନ । 2009ରୁ ବିଜେଡି କବଜାରେ ରହି ଆସିଛି ଏହି ଆସନ । ଏଥର ପୁଣି ଥରେ ଏହି ସିଟ୍ ହାତେଇବାକୁ ଲକ୍ଷ୍ୟ ରଖିଛି ଶାସକ ଦଳ । ତେବେ ଗତ ଦୁଇଟି ନିର୍ବାଚନରେ ଶକ୍ତି ବୃଦ୍ଧି କରି ଆସୁଥିବା ବିଜେପି 2024ରେ କଡ଼ା ଟକ୍କର ଦେବାକୁ ଅଣ୍ଟା ଭିଡୁଛି । ସେପଟେ ଅଣ୍ଟା ସଳଖିବାକୁ ଉଦ୍ୟମ କରୁଥିବା କଂଗ୍ରେସ ପାର୍ଟି ଏଥର ନୂଆ ମୁହଁ ଛିଡ଼ା କରିବାକୁ ଯୋଜନା କରୁଛି।
2014 ବିଧାନସଭା ନିର୍ବାଚନରେ ଭୁବନେଶ୍ବର ମଧ୍ୟ ଆସନରୁ ବିଜେଡିର ବିଜୟ କୁମାର ମହାନ୍ତି 50 ହଜାର 107 ଭୋଟ୍ ପାଇ ବିଜୟୀ ହୋଇଥିଲେ । ବିଜେପି ପ୍ରାର୍ଥୀ ଜଗନ୍ନାଥ ପ୍ରଧାନ ପାଇଥିଲେ 27 ହଜାର 718 ଭୋଟ୍ । କଂଗ୍ରେସ ପ୍ରାର୍ଥୀ ଶୁଭେନ୍ଦୁ ମହାନ୍ତି 11 ହଜାର 429 ଭୋଟ ପାଇ ତୃତୀୟ ସ୍ଥାନରେ ଥିଲେ । ସେହିପରି 2019 ବିଧାନସଭା ନିର୍ବାଚନରେ ଭୁବନେଶ୍ବର ମଧ୍ୟ ଆସନରୁ ବିଜେଡିର ଅନନ୍ତ ନାରାୟଣ ଜେନା 54 ହଜାର 22 ଭୋଟ ପାଇ ବିଜୟୀ ହୋଇଥିଲେ । ବିଜେପି ପ୍ରାର୍ଥୀ ଜଗନ୍ନାଥ ପ୍ରଧାନ 42ହଜାର 580 ଭୋଟ ପାଇ ଦ୍ବିତୀୟ ସ୍ଥାନରେ ଥିବା ବେଳେ, କଂଗ୍ରେସ ପ୍ରାର୍ଥୀ ରାଜୀବ ପଟ୍ଟନାୟକଙ୍କୁ ମିଳିଥିଲା ମାତ୍ର 2,746 ଭୋଟ୍ । ଗତ 3ଟି ନିର୍ବାଚନରେ ବିଜେଡିର ଦବଦବା ରହିଛି ଏହି ଆସନରେ । 2014 ତୁଳନାରେ 2019ରେ ବିଜେପିର ଭୋଟ୍ ପରିମାଣ ବୃଦ୍ଧି ପାଇଥିବା ବେଳେ, ପରାଜୟର ମାର୍ଜିନ ମଧ୍ୟ କମ୍ ରହିଥିଲା ।
ଏହା ମଧ୍ୟ ପଢ଼ନ୍ତୁ: ରାଜନଗର ରାଜନୀତି: ରେଜଲ୍ଟ ରିପିଟ୍ ହେବ ନା ହେବ ପରିବର୍ତ୍ତନ
2009ରୁ ବିଜେଡି କବଜାରେ ରହିଆସିଛି ଏହି ଆସନ । 2019ରେ ଏଠାରୁ ବିଜେଡି ଟିକେଟରେ ବିଜୟୀ ହୋଇଥିଲେ ଅନନ୍ତ ନାରାୟଣ ଜେନା । 2024 ନିର୍ବାଚନ ପୁଣି ଥରେ ପ୍ରାର୍ଥୀ ହେବାକୁ ଆଶା ବାନ୍ଧଛନ୍ତି ଅନନ୍ତ । ଏଥିପାଇଁ ସେ ନିର୍ବାଚନୀ ପ୍ରସ୍ତୁତି ବି ଆରମ୍ଭ କରି ଦେଇଛନ୍ତି । ଅନନ୍ତ କହିଛନ୍ତି, ନିର୍ବାଚନୀ ମଣ୍ଡଳୀରେ ଅନେକ ବିକାଶ କାର୍ଯ୍ୟ ହୋଇଛି । ଆଲୋକୀକରଣ ହେଉ କିମ୍ବା ବସ୍ତିବାସିନ୍ଦାଙ୍କୁ ଯାଗା ଓ ଘର ପ୍ରଦାନ, ସମସ୍ତ କାମ ହୋଇଛି। ଆଗାମୀ ନିର୍ବାଚନରେ ବିକାଶ ମୁଖ୍ୟ ମୁଦ୍ଦା ହେବ ବୋଲି କହିଛନ୍ତି ଅନନ୍ତ । ତେବେ ଏଥର ଟିକେଟ ମିଳିବ କି ନାହିଁ, ସେ ପ୍ରଶ୍ନର ଉତ୍ତରରେ ଅନନ୍ତଙ୍କ କହିବା ହେଲା, ଦଳର ସୁପ୍ରିମ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିଷ୍ପତ୍ତି ହିଁ ସର୍ବମାନ୍ୟ । ଅନନ୍ତ ନାରାୟଣ ଟିକେଟ ପାଇଁ ଆଶା ବାନ୍ଧିଥିବା ବେଳେ, ତାଙ୍କ ପାଇଁ କଣ୍ଟା ସାଜି ପାରନ୍ତି ଦଳର ଅନ୍ୟ ଆଶାୟୀ । 2019ରେ ପ୍ରାର୍ଥୀ ପରିବର୍ତ୍ତନ କରିଥିଲା ବିଜେଡି । ସେହି ଦୃଷ୍ଟିରୁ 2024ରେ ଦଳ ନୂଆ ପ୍ରାର୍ଥୀଙ୍କୁ ସୁଯୋଗ ଦେବାର ସମ୍ଭାବନାକୁ ଏଡ଼ାଇ ଦିଆଯାଇ ନପାରେ । କାହାକୁ ମିଳିବ ବିଜେଡି ଟିକେଟ, ତାହା ତୟ ହୋଇ ନଥିବା ବେଳେ, ଏହି ଦୌଡ଼ରେ ଅଛନ୍ତି ଯୁବ ସମାଜସେବୀ ରୁଦ୍ର ସାମନ୍ତରାୟ ଏବଂ ଅମରେଶ ଜେନା ।