ଖୋର୍ଦ୍ଧା: ମାଆକୁ ସମ୍ମାନ ଗାଁକୁ ବିକାଶ ସରକାରଙ୍କ ସ୍ଲୋଗାନ ଯାହା ଏବେ ଭୁଲ ପ୍ରମାଣିତ କରିଛନ୍ତି ଗ୍ରାମବାସୀ । ଗାଁ ବିକାଶର ସ୍ଲୋଗାନ ଏବେ ସ୍ଲୋଗାନରେ ହିଁ ରହିଯିବା ପରି ଦେଖିବାକୁ ମିଳିଛି । ଯାହା ଆଜି ଆମେ ଦେଖାଉଛୁ ତାହା କେଉଁ ପୋଖରୀ କିମ୍ବା ଗାଡିଆର ମାଛମରା ଦୃଶ୍ୟ ନୁହଁ ବରଂ ଗାଁ ମୁଖ୍ୟ ରାସ୍ତାରୁ ମାଛମରା ଦୃଶ୍ୟ । ଖୋର୍ଦ୍ଧା ଜିଲ୍ଲା ବୋଲଗଡ ବ୍ଳକ ଅସରଳା ଗ୍ରାମର ମାଳିସାହି ରାସ୍ତାରେ ଜମା ହୋଇଥିବା ପାଣିରୁ ମାଛମରା ଦୃଶ୍ୟ ।
ଭିଡିଓ ସୌଜନ୍ୟ: ପ୍ରତିନିଧି, ଖୋର୍ଦ୍ଧା
ରାସ୍ତାରେ ଜମା ହୋଇଥିବା ପାଣିରୁ ଶତାଧିକ ଗ୍ରାମବାସୀ ଆଜି (ମଙ୍ଗଳବାର) ଜାଲ ସାହାଯ୍ୟରେ ମାଛ ମାରୁଥିବା ଦୃଶ୍ୟ ଦେଖିବାକୁ ମିଳିଥିଲା । ଡ୍ରେନେଜ ବ୍ୟବସ୍ଥା ନଥିବାରୁ ବର୍ଷର ସବୁ ସମୟରେ ଏହି ରାସ୍ତାରେ ପାଣି ଜମା ହୋଇଥାଏ । ଯାହାଫଳରେ ରାସ୍ତାପାଖ ଘର ଲୋକଙ୍କ ସହ ସାଧାରଣ ଲୋକେ ବିଭିନ୍ନ ଅସୁବିଧା ନେଇ ପଞ୍ଚାୟତରୁ ବ୍ଳକ ପ୍ରଶାସନିକ ଅଧିକାରୀଙ୍କୁ ବାରମ୍ବାର ଅଭିଯୋଗ ଜଣାଇଥିଲେ । ଏହା ସତ୍ତ୍ବେଏହି ରାସ୍ତା ପ୍ରତି କାହାର ଦୃଷ୍ଟି ଆକର୍ଷଣ ହୋଇପାରୁନଥିଲା ।