ଖୋର୍ଦ୍ଧା:ବାସୁଦେବ ପ୍ରଧାନ ଅପହରଣ ଓ ହତ୍ୟା ମାମଲା ଉପରୁ ପରଦା ଉଠାଇଛି ପୋଲିସ । ଏ ଘଟଣାରେ ତିନି ଅଭିଯକ୍ତଙ୍କୁ ଗିରଫ କରିଛି ପୋଲିସ । ମୁଖ୍ୟ ଅଭିଯୁକ୍ତ ତଥା କବାଡ଼ି ଗୋଦାମର ମାଲିକ ରବିନ୍ଦ୍ର ମୁଦୁଲି ସହ ଅନ୍ୟ 2 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଏହାସହ ଘଟଣାର ଅଧିକ ତଦନ୍ତ ଜାରି ରଖିଛି । ଗିରଫ ହୋଇଥିବା ଅଭିଯୁକ୍ତମାନେ ହେଲେ ମୁଖ୍ୟ ଅଭିଯୁକ୍ତ ତଥା କବାଡ଼ି ଗୋଦାମର ମାଲିକ ରବିନ୍ଦ୍ର ମୁଦୁଲି, ରବିନ୍ଦ୍ରଙ୍କ ଭାଇ ମାନସ ମୁଦୁଲି ଓ ଛବି ମୁଦୁଲି ।
ସୂଚନା ଅନୁସାରେ, ପୁବୁସାହି ନିକଟ କପିଳେଶ୍ବର କବାଡ଼ି ଗୋଦାମରେ କାମ କରନ୍ତି ବାସୁଦେବ ପ୍ରଧାନ । ଗୋଦାମରୁ ତମ୍ବା ସାମଗ୍ରୀ ଚୋରି କରିବା ଘଟଣାରେ ମାଲିକ ରବିନ୍ଦ୍ର ଅନ୍ୟଜଣେ କର୍ମଚାରୀ ପ୍ରଦୀପ ପ୍ରଧାନ ଓ ବାସୁଦେବ ପ୍ରଧାନଙ୍କୁ ସନ୍ଦେହ କରୁଥିଲା । ଏଣୁ ଉଭୟଙ୍କୁ ଅଟକ ରଖି ନିସ୍ତୁକ ମାଡ଼ କରିଥିଲା । ମାଡ଼ ଖାଇ ପ୍ରଦୀପ ନିଜର ଦୋଷ ସ୍ବୀକାର କରିଥିବା ବେଳେ ବାସୁଦେବ କିନ୍ତୁ ଏହି ଚୋରିରେ ସମ୍ପୃକ୍ତ ନଥିବା କହିଥିଲା । ତଥାପି ବାସୁଦେବଙ୍କୁ ମାଡ ମାରିଥିଲା ଗୋଦାମ ମାଲିକ ।