ଖୋର୍ଦ୍ଧା: ମାଟି ଗାଏ ସ୍ୱାଧୀନତା ସଂଗ୍ରାମର ସଙ୍ଗୀତ । ପବନରେ ଶୁଭେ ବନ୍ଦେ ମତରମ, ଭାରତ ମାତା କି ଜୟ । କର୍ପୁର ଉଡିଯାଇଛି ହେଲେ କନା ପଡିଛି । ଗର୍ବର ସହ ମଥାଟେକି ଗାଁଟି କହୁଛି ମୁ ସ୍ୱାଧୀନତା ସଂଗ୍ରାମୀଙ୍କ ଗାଁ । ଆଉ ଏହି ଗ୍ରାମ ହେଉଛି ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ ଅନ୍ତର୍ଗତ ଚମ୍ପାଇଲୋ ଗାଁ ।
ଶେଷରେ ଦେଶ ସ୍ବାଧିନତା ପାଇଲା, ସେମାନଙ୍କ ସଂଗ୍ରାମ ସାର୍ଥକ ହେଲା । ପରେ ଦେଶ ସ୍ୱାଧୀନ ହେଲା ମାତ୍ର, ବିଡମ୍ବନା ସ୍ୱାଧୀନତାର ସ୍ବର୍ଣ୍ଣିମ ଫର୍ଦ୍ଦରୁ ହଜିଗଲା ଚମ୍ପାଇଲୋ ଗାଁ । ଏପରିକି ଗାଁରେ ଶହୀଦ ସ୍ତମ୍ଭଟିଏ ନାହିଁ, କି ସଂଗ୍ରାମୀଙ୍କ ସ୍ମୃତିରେ ଆଖିଦୃଶିଆ ପଦକ୍ଷେପ ନେଇନାହାନ୍ତି ସରକାର । ସରକାରୀ ଅବହେଳାରୁ ଖଦି ଆନ୍ଦୋଳନ ସମୟରେ ନିର୍ମାଣ ହୋଇଥିବା ଖଦିକେନ୍ଦ୍ର ତାର ସତ୍ତା ହରାଇବାକୁ ବସିଲାଣି ।
ଏକଦା ଚମ୍ପାଇଲୋର ଗରିବ ପରିବାରର ମୁଖିଆ ମାନେ କାମଧନ୍ଦା ପାଇଁ ସୁଦୂର ରେଂଗୁନ ଯାଇଥିଲେ । ସେଇଠି ପଡିଥିଲା ନେତାଜୀଙ୍କ ଆଜାଦ ହିନ୍ଦ ଫୌଜର ମୂଳଦୁଆ । ମାଟି ମା ଆଗରେ ପରିବାର ତୁଚ୍ଛ ହୋଇଗଲା । ଆଜାଦ ହିନ୍ଦ ଫୌଜରେ ସାମିଲ ହେଲେ ଚମ୍ପାଇଲୋ ଗ୍ରାମର 20ରୁ ଊର୍ଦ୍ଧ୍ବ ସେନାନୀ ।
ସମୟ କ୍ରମେ ଏ ସଂଗ୍ରାମୀଙ୍କ ବାଳିଦାନକୁ ସ୍ମରଣୀୟ ରଖିବା ପାଇଁ ସରକାର କେବଳ ତାମ୍ର ଫଳକ ଟିଏ ଧରାଇ ଦେଇ ହାତବାନ୍ଧି ବସିଛନ୍ତି । ନିଜ ତ୍ୟାଗ ଓ ସଂଗ୍ରାମ ପାଇଁ ଚମ୍ପାଇଲୋକୁ ମିଳିନି ହକ । ଏ ଅଣଦେଖାକୁ ନେଇ କ୍ଷୋଭ ପ୍ରକାଶ କରିଛନ୍ତି ସଂଗ୍ରାମୀଙ୍କ ଦାୟାଦ ମାନେ । ଗାଁରେ ସଂଗ୍ରାମୀ ମାନଙ୍କ ପ୍ରତିମୂର୍ତ୍ତି ଓ ଶହୀଦ ଭବନ ନିର୍ମାଣ ପାଇଁ ଦାବି ହେଉଛି । ଏପରିକି ନେତାଜୀଙ୍କ ଜୟନ୍ତୀ ପାଳନ ପାଇଁ କେନ୍ଦ୍ର କରିଥିବା କମିଟିରେ ସଂଗ୍ରାମୀଙ୍କ ଦାୟାଦଙ୍କୁ ସ୍ଥାନ ଦେବାକୁ ଦାବି ମଧ୍ୟ ତେଜିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ