ଭୁବନେଶ୍ବର: ଜଟଣୀ ନିର୍ବାଚନ ମଣ୍ଡଳୀରୁ ବିଧାୟକ ପ୍ରାର୍ଥୀ ଭାବରେ ଲଢ଼ିବେ ସୁର ରାଉତରାୟଙ୍କ ସାନ ପୁଅ ମନ୍ମଥ ରାଉତରାୟ । କଂଗ୍ରେସ ବିଧାୟକ ସୁର ରାଉତରାୟଙ୍କ ସାନ ପୁଅ ମନ୍ମଥ ରାଉତରାୟ ଚାକିରି ଛାଡ଼ି ରାଜନୀତିରେ ପାଦ ଥାପିଛନ୍ତି । ପଟୁଆର ସହ ପୁଅଙ୍କୁ ସ୍ବାଗତ ପାଇଁ ଏୟାରପୋର୍ଟରେ କଂଗ୍ରେସ ବିଧାୟକ ସୁର ରାଉତରାୟ ଓ ଜଟଣୀବାସୀ ପହଞ୍ଚିଥିଲେ । ଜଟଣୀ ନିର୍ବାଚନ ମଣ୍ଡଳୀର ଦାୟିତ୍ବ ସମ୍ପୂର୍ଣ୍ଣ ଭାବେ ମନ୍ମଥ ନେଲେ ବୋଲି ଗଣମାଧ୍ୟରେ ଘୋଷଣା କଲେ ବାପା ସୁର ରାଉତରାୟ । କିନ୍ତୁ କେଉଁ ଦଳରୁ ଲଢ଼ିବେ ତାହା ଏବେ ମଧ୍ୟ ସ୍ପଷ୍ଟ କଲେନାହିଁ ।
ଭୁବନେଶ୍ବର ବିମାନ ବନ୍ଦରରେ ମନ୍ମଥ ରାଉତରାୟ ପହଞ୍ଚିବା ପରେ ତାଙ୍କୁ ଭବ୍ୟ ସ୍ଵାଗତ କରାଯାଇଥିଲା । ବାଟ ବାଟରେ ଶୁଭେଚ୍ଛା ଓ ଲୋକମାନଙ୍କ ଭଲ ପାଇବା ସାଉଁଟିଥିଲେ ମନ୍ମଥ । ଗଣମାଧ୍ୟମକୁ ପ୍ରତିକ୍ରିୟା ଦେଇ ମନ୍ମଥ କହିଛନ୍ତି, "ବାପାଙ୍କ ଭଳି ସଚ୍ଚୋଟ ରହିବି, ଲୋକଙ୍କ ପାଇଁ କାମ କରିବି । ଭଲ ମଣିଷ ଶିକ୍ଷିତ ଓ ଯୁବ ନେତା ଚାହୁଁଛନ୍ତି ଜଟଣୀବାସୀ । ମୁଁ ୫ ବର୍ଷ ହେବ ଜଟଣୀ ନିର୍ବାଚନ ମଣ୍ଡଳୀ ପାଇଁ କାମ କରିଆସୁଛି, ଆହୁରି ଆଗକୁ କାମ କରିବି ।" ସେପଟେ ସୁର କହିଛନ୍ତି, "ଓଡିଶା ଜନସାଧାରଣଙ୍କୁ ସ୍ପଷ୍ଟ ଭାବେ କହୁଛି ଆଗକୁ ହେବାକୁ ଥିବା ସାଧାରଣ ନିର୍ବାଚନରେ ମୁଁ ଆଉ ଲଢ଼ିବି ନାହିଁ । ମୋ ସ୍ଥାନରେ ମୋ ସାନ ପୁଅ ମନ୍ମଥ ରାଉତରାୟ ଜଟଣୀରୁ ନିର୍ବାଚନ ଲଢ଼ିବେ । ଜଟଣୀରେ ମୁଁ ଯେଉଁ ବିକାଶମୂଳକ କାର୍ଯ୍ୟ କରିଛି ତାହା ଜଟଣୀବାସୀ ଦେଖୁଛନ୍ତି । ଜଟଣୀ ପାଇଁ ବିଭିନ୍ନ ଲୋକାଭିମୁଖୀ କାର୍ଯ୍ୟ ମୁଁ କରିଛି । ତାକୁ ପୁଞ୍ଜି କରି ଆଗାମୀ ଦିନରେ ମୋ ପୁଅ ଲଢ଼ିବ ।"