ଭୁବନେଶ୍ବର: ଚୋରି ହୋଇଥିବା ଜିନିଷ ମିଳିବା ପରେ ଖୁସି ପ୍ରକଟ କରିଛନ୍ତି ପ୍ରବୋଧଙ୍କ ବାପା ଏ.ତିର୍କି । ଗତକାଲି (ଶୁକ୍ରବାର) ପୂର୍ବତନ ଭାରତୀୟ ହକି ଟିମ୍ ଅଧିନାୟକ ତଥା ପୂର୍ବତନ ହକି ତାରକା ପ୍ରବୋଧ ତିର୍କିଙ୍କ ଚୋରି ଜିନିଷ ମିଳିଥିଲା । ଏହି ଘଟଣାରେ ସମ୍ପୃକ୍ତ ଥିବା ୫ ଅଭିଯୁକ୍ତଙ୍କୁ ପୋଲିସ ସିସିଟିଭି ଫୁଟେଜକୁ ଆଧାର କରି ଗିରଫ କରିଥିଲା ।
ତେବେ ଏହାରି ଭିତରେ ତାଙ୍କ ମନରେ ଥିବା କ୍ଷୋଭକୁ ମଧ୍ୟ ପ୍ରକାଶ କରିଛନ୍ତି ପ୍ରବୋଧଙ୍କ ବାପା ଏ ତିର୍କି । ସେ କହିଛନ୍ତି, ''ସରକାରୀ କ୍ବାର୍ଟରରୁ ଚୋରି ହେଉଛି । ଖୋଦ୍ ମୁଖ୍ୟମନ୍ତ୍ରୀଙ୍କ ସଚିବଙ୍କ ଘର ସାମ୍ନାରୁ ଚୋରି ହେଉଛି। ତେବେ ସାଧାରଣ ଲୋକଙ୍କ ଘର ଏଠାରେ କେତେ ସୁରକ୍ଷିତ ଏଥିରୁ ଜଣାପଡୁଛି । ଯଦି ପୋଲିସ ନିୟମିତ ତା କାର୍ଯ୍ଯ ଠିକ୍ ଭାବେ କରନ୍ତା ତାହାଲେ ହୁଏତ ଚୋରିରେ ରୋକ ଲାଗନ୍ତା ଏବଂ ଚୋରର ମଧ୍ୟ ଡର ରହନ୍ତା । ଯେତେବେଳେ ଜାଣିଲୁ ଘରୁ ଚୋରି ହୋଇଛି ଆମେ ଭାଙ୍ଗି ପଡିଥିଲୁ। ପ୍ରବୋଧ କେତେ ପରିଶ୍ରମ କରି ମେଡାଲ ଆଣିଥିଲା । ସେସବୁ ଚୋରି ପରେ ସେ ପୁରା ଭାଙ୍ଗିପଡିଥିଲା ।''
ସୂଚନାନୁସାରେ ଗତ ୨୧ତାରିଖରେ ପୂର୍ବତନ ଭାରତୀୟ ହକି ଟିମ ଅଧିନାୟକ ତଥା ପୂର୍ବତନ ହକି ତାରକା ପ୍ରବୋଧ ତିର୍କିଙ୍କ ଘରୁ ଚୋରି ହୋଇଥିଲା । ଚୋର ଘର ଭିତରୁ ଟିଭି ସମେତ କ୍ୟାମେରା, ମେଡାଲ ଓ ବିଭିନ୍ନ ଘରକରଣା ଜିନିଷ ଚୋରି କରି ନେଇଥିଲେ। ଏନେଇ ୨୨ତାରିଖରେ କ୍ୟାପିଟାଲ ଥାନାରେ ଅଭିଯୋଗ କରିଥିଲେ ପ୍ରବୋଧଙ୍କ ପରିବାର ।