ଭୁବନେଶ୍ବର: ରବିବାର ଦିନିକିଆ ଗଞ୍ଜାମ ଗସ୍ତରେ ଯାଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଜିଲ୍ଲାର ବିଭିନ୍ନ ସ୍ଥାନରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ବିଭିନ୍ନ ଉନ୍ନତିମୂଳକ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରିଛନ୍ତି ମୁଖ୍ୟମନ୍ତ୍ରୀ । ତେବେ ମୁଖ୍ୟମନ୍ତ୍ରୀଙ୍କ ଗଞ୍ଜାମ ଜିଲ୍ଲା ଗସ୍ତକୁ ନେଇ ରାଜ୍ୟ ବିଜେପି ଉପସଭାପତି ଭୃଗୁ ବକ୍ସିପାତ୍ର ବର୍ଷିଛନ୍ତି । ମୁଖ୍ୟମନ୍ତ୍ରୀ ନିର୍ବାଚନ ଜିତିବା ପରେ ନିଜ ନିର୍ବାଚନ ମଣ୍ଡଳୀକୁ କେତେ ଥର ଯାଇଛନ୍ତି ବୋଲି ପ୍ରଶ୍ନ କରିବା ସହ ଆଗକୁ ନିର୍ବାଚନ ଆସୁଥିବାରୁ ଏହି ଗସ୍ତ କରିଥିବା କହିଛନ୍ତି ବିଜେପି ଉପସଭାପତି ।
ତେବେ ରାଜ୍ୟ ବିଜେପି ଉପସଭାପତି ଭୃଗୁ ବକ୍ସିପାତ୍ର ମୁଖ୍ୟମନ୍ତ୍ରୀଙ୍କୁ କଡ଼ା ସମାଲୋଚନା କରିଛନ୍ତି । ସେ କହିଛନ୍ତି, "ମୁଖ୍ୟମନ୍ତ୍ରୀ ଆଜି ନିଜ ନିର୍ବାଚନୀ ମଣ୍ଡଳୀକୁ ଯାଇଛନ୍ତି । ଗତ ୫ ବର୍ଷ ଭିତରେ ନିର୍ବାଚନ ବିଜୟ ପରେ ସେ ଗଞ୍ଜାମ କେତେ ଥର ଯାଇଛନ୍ତି । ଲାଗୁଛି ନିର୍ବାଚନ ଆଗକୁ ଥିବାବେଳେ ନିଜ ଦଳ ଭିତରେ ଗୋଷ୍ଠୀକନ୍ଦଳ ଜୋର୍ । ନିଜ ନିଜ ନିର୍ବାଚନୀ ମଣ୍ଡଳୀରେ ଲୋକଙ୍କୁ ବିଜେଡି ନେତା ଓ କର୍ମୀମାନେ ହତ୍ୟା କରିବାରେ ବ୍ୟସ୍ତ । ଆଜି ମୁଖ୍ୟମନ୍ତ୍ରୀ ଥିବା ସମୟରେ ମଧ୍ୟ କବିସୂର୍ଯ୍ୟନଗରରେ ହତ୍ୟା ହୋଇଛି । ଗତକାଲି ଦିଗପହଣ୍ଡିରେ ହତ୍ୟା ହୋଇଛି । ବିଜେଡିର ଗୋଷ୍ଠୀକନ୍ଦଳ ଯୋଗୁଁ ଦିଗପହଣ୍ଡିରେ ନିଜ ନିଜ ଭିତରେ ହତ୍ୟା ହୋଇଛି । ଏହା ପରେ ବି ସରକାରୀ କାମକୁ ଆଖି ଆଗରେ ରଖି ସରକାରୀ କାମରେ ଲୋନ ବାଣ୍ଟିବାକୁ ଯାଇଥିଲେ । ସରକାରୀ ବାବୁମାନେ ଗଲେ ସାଂସଦ ଓ ବିଧାୟକ ରହୁ ନାହାନ୍ତି । ତେଣୁ ମୁଖ୍ୟମନ୍ତ୍ରୀଙ୍କ ଗସ୍ତ ଏକ ରାଜନୈତିକ ଉଦ୍ଦେଶ୍ୟ । ନିଜ ଦଳର ଅବ୍ୟବସ୍ଥାକୁ ବ୍ୟବସ୍ଥା କରିବାର ଏକ ଚେଷ୍ଟା ।" ସାଧାରଣ ଲୋକଙ୍କ ସହିତ ମୁଖ୍ୟମନ୍ତ୍ରୀଙ୍କ ଗସ୍ତର କିଛି ସମ୍ପର୍କ ନାହିଁ ବୋଲି ସିଧା ସିଧା କହିଛନ୍ତି ଭୃଗୁ ବକ୍ସିପାତ୍ର ।