ଭୁବନେଶ୍ବର:ଦ୍ବିତୀୟ ଥର ପାଇଁ ରାଜ୍ୟରେ ପଲିଟେକ୍ନିକ୍ କଲେଜ ରାଙ୍କିଂ ପ୍ରକାଶ ପାଇଛି । ଆଜି ଦକ୍ଷତା ବିକାଶ ଓ ବୈଷୟିକ ମନ୍ତ୍ରୀ ପ୍ରୀତିରଞ୍ଜନ ଘଡାଇ ଏହାର ରାଙ୍କ୍ ଉନ୍ମୋଚନ କରିଛନ୍ତି । ୧୦୦ଟି ସରକାରୀ ଓ ବେସରକାରୀ ପଲିଟେକ୍ନିକ୍ କଲେଜକୁ ରାଙ୍କ୍ ମିଳିଛି । ୩୦ଟି ଜିଲ୍ଲାରେ ଥିବା ପଲିଟେକ୍ନିକ୍ ଇନଷ୍ଟିଚ୍ୟୁଟ ଏଥିରେ ଅଂଶଗ୍ରହଣ କରିଛନ୍ତି । ରାଜ୍ୟରେ ୩୪ଟି ସରକାରୀ ପଲିଟେକ୍ନିକ୍ ସହ ୬୬ଟି ବେସରକାରୀ ପଲିଟେକ୍ନିକ୍ ଅନୁଷ୍ଠାନ ରହିଛି । ତେବେ ଆଜି ଦକ୍ଷତା ବିକାଶ ଓ ବୈଷୟିକ ମନ୍ତ୍ରୀ ପ୍ରୀତିରଞ୍ଜନ ଘଡାଇ ଉନ୍ମୋଚନ କରିଥିବା ରାଙ୍କ୍ର ପ୍ରଥମ ୧୦ଟି ସ୍ଥାନ ମଧ୍ୟରେ ୪ଟି ସରକାରୀ ଓ ୬ଟି ବେସରକାରୀ କଲେଜ ରହିଛି ।
ଅନ୍ୟପଟେ ଏହି ରାଙ୍କିଂର ପ୍ରଥମ ସଂସ୍କରଣ ୨୦୨୨ ମସିହାରେ ପ୍ରକାଶିତ ହୋଇଥିଲା । ଏହି ରାଙ୍କିଂ ବ୍ୟବସ୍ଥାରେ କିଭଳି ଭାବରେ ସ୍ଵଚ୍ଛତା ରହିବ, ସେନେଇ କ୍ବାଲିଟି କଣ୍ଟ୍ରୋଲ ଅଫ୍ ଇଣ୍ଡିଆକୁ ଦାୟିତ୍ବ ଦିଆଯାଇଛି । ଏହି ସଂସ୍ଥା ରାଙ୍କିଂରେ ସ୍ଥାନ ପାଇଥିବା ରାଜ୍ୟର ୧୦୦ଟି ପଲିଟେକ୍ନିକ୍ କ୍ଷେତ୍ର ପରିଦର୍ଶନ ସହିତ ଏକାଧିକ ପର୍ଯ୍ୟାୟରେ ମୂଲ୍ୟାଙ୍କନ କାର୍ଯ୍ୟ କରୁଛି । ଏଥିରେ ରହିଛନ୍ତି ଉଭୟ ସରକାରୀ ଏବଂ ଘରୋଇ ପଲିଟେକ୍ନିକ୍ ଶିକ୍ଷାନୁଷ୍ଠାନ । ରାଙ୍କ ପାଇଁ ବ୍ୟବହୃତ ପାରାମିଟର ଗୁଡ଼ିକ ସରକାରୀ ଦ୍ବାରା ଅନୁମୋଦିତ ହୋଇଛି । ପଲିଟେକ୍ନିକ୍ର ରାଙ୍କିଂ ସରକାରୀ 5T କାର୍ଯ୍ୟକ୍ରମ ଅଧୀନରେ ଆସୁଛି ।