ଖୋର୍ଦ୍ଧା: ଜିଲ୍ଲା ବାଲୁଗାଁ ବାଇପାସ 16 ନମ୍ବର ଜାତୀୟ ରାଜପଥ ମଠପାଟଣା ଛକ ନିକଟରେ ଗତକାଲି ରାତିରେ ସଡକ ଦୁର୍ଘଟଣା ଘଟିଛି । ସାଇକେଲରେ ଅଜା ନାତି ଯାଇଥିବା ବେଳେ ସ୍କର୍ପିଓ ଧକ୍କାରେ ଅଜାଙ୍କର ମୃତ୍ୟୁ ହୋଇଥିବା ବେଳେ ନାତି ଆହତ ହୋଇଛି ।
ସୂଚନାଅନୁସାରେ,ମଠପାଟଣା ଗ୍ରାମର ସନିଆ ସାଇକେଲରେ ତାଙ୍କ ନାତିକୁ ବସାଇ ରାସ୍ତା ପାରି ହେଉଥିଲେ । ଏହି ସମୟରେ ଭୁବନେଶ୍ବରରୁ ବ୍ରହ୍ମପୁର ଅଭିମୁଖେ ଯାଉଥିବା ଏକ ସ୍କର୍ପିଓ ମଠପାଟଣା ଛକରେ ସାଇକେଲକୁ ଧକ୍କା ଦେଇଥିଲା । ଫଳରେ ଅଜା ନାତି ଦୁଇଜଣ ସାଇକେଲରୁ ଛିଟିକି ପଡି ଗୁରୁତର ଆହତ ହୋଇଥିଲା । ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଚିକିତ୍ସା ପାଇଁ ବାଲୁଗାଁ ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର ସନିଆଙ୍କୁ ମୃତ ଘୋଷଣା କରିଥିଲେ ।