ଭୁବନେଶ୍ବର:ଆଜି ପବିତ୍ର ସାବିତ୍ରୀ ବ୍ରତ । ଏନେଇ ଚଳ ଚଞ୍ଚଳ ଗାଁଠୁ ସହର । ହିନ୍ଦୁ ମହିଳାଙ୍କ ପାଇଁ ଏହି ଦିନଟି ସ୍ବତନ୍ତ୍ର । ଦିନଟି ପ୍ରତି ସଧବାଙ୍କ ପାଇଁ ଗୁରୁତ୍ବ ବହନ କରିଥାଏ । ସ୍ବାମୀଙ୍କ ଦୀର୍ଘାୟୁ କାମନା କରି ମନ୍ଦିରରେ ପୂଜାର୍ଚ୍ଚନା କରିଛନ୍ତି ସ୍ତ୍ରୀ । ସକାଳୁ ସକାଳୁ ସ୍ବାମୀଙ୍କ ପାଇଁ ପୂଜାର୍ଚ୍ଚନା କରିବାକୁ ମନ୍ଦିରରେ ଲମ୍ବା ଧାଡି ଲାଗିଛି । ମଥାରେ ସିନ୍ଦୁର ହାତରେ ଚୁଡି ଓ ରଙ୍ଗ ବେରଙ୍ଗର ଶାଢୀ ପିନ୍ଧି ସତ୍ୟବାନଙ୍କ ପାଇଁ ପୂଜା କରିବାକୁ ମନ୍ଦିରରେ ସାବିତ୍ରୀଙ୍କ ଭିଡ ଲାଗିଛି । ସଧବାର ସମ୍ପତ୍ତି ଶଙ୍ଖା, ସିନ୍ଦୁରକୁ ବଜ୍ର ରଖିବା ପାଇଁ ମାନସିକ କରି ବ୍ରତ ପାଳିଛନ୍ତି ପତ୍ନୀ ।
ପରମ୍ପରା ଅନୁସାରେ ବିବାହିତା ମହିଳାମାନେ ଏହି ବ୍ରତ ପାଳନ କରିଥାନ୍ତି । ଜୈଷ୍ଠ ଅମାବାସ୍ୟା ଦିନ ସାବିତ୍ରୀ ଓଷା ପାଳନ ହୁଏ । ପ୍ରାଣପ୍ରିୟଙ୍କ ଦୀର୍ଘ ଜୀବନ ମନାସି ସାବିତ୍ରୀ ବ୍ରତ ପାଳନ କରିଛନ୍ତି ପତ୍ନୀ । ସ୍ବାମୀଙ୍କ ମଙ୍ଗଳ ମନାସୀ ନିଶ୍ବାସ ଥିବାଯାଏ ସଧବା ରହିବାକୁ ଏହି ଓଷା ପାଳନ କରିଛନ୍ତି । ସକାଳୁ ପୂଜା ଥାଳି ଧରି ସଜେଇ ହୋଇ ନିର୍ଜଳା ବ୍ରତ କରି ମନ୍ଦିରରେ ପୂଜା କରିଛନ୍ତି । ଏ ପୂଜାର ଆରାଧ୍ୟା ଦେବୀ ହେଉଛନ୍ତି ମା' ସାବିତ୍ରୀ । ସାବିତ୍ରୀ ବ୍ରହ୍ମାଙ୍କ ପତ୍ନୀ, ଗାୟତ୍ରୀ, ସୂର୍ଯ୍ୟାଧିଷ୍ଠାତ୍ରୀ ଦେବୀ । ଦେବୀ ସାବିତ୍ରୀଙ୍କ ମାନବୀ ସାବିତ୍ରୀଙ୍କ ପ୍ରତି ଆଶୀର୍ବାଦ ଓ କରୁଣା କିପରି ସତ୍ୟବାନଙ୍କୁ ମୃତ୍ୟୁକବଳରୁ ଫେରାଇ ଆଣିଥିଲେ ତାହାକୁ ଆଧାର କରି ମା' ସାବିତ୍ରୀଙ୍କୁ ପୂଜା କରାଯାଏ ।
ଫଳ ରେଟ ପ୍ରବଳ: ସାବିତ୍ରୀ ବ୍ରତ ପାଇଁ ଫଳ ବଜାରରେ ଗ୍ରାହକଙ୍କ ଭିଡ ଲାଗିଛି । ବିଭିନ୍ନ ପ୍ରକାର ଫଳ ପସରା ମେଲିଛି । ହେଲେ ଫଳ ବଜାରରେ ନିଆଁ ଲାଗିଛି । ଆକାଶ ଛୁଆଁ ହୋଇଛି ଫଳ ରେଟ । ଫଳ ଦର ଏତେ ଯେ ହାତ ମାରି ହେଉନି କି ବ୍ୟାଗ ଭରୁ ନାହିଁ । ସେଓ କିଲୋ 250 ହୋଇଥିବା ବେଳେ ଲିଚୁ 150 ଟଙ୍କା ହୋଇଥିବା ବେଳେ ଆମ୍ବ କିଲୋ 80 ଟଙ୍କା, ଅଙ୍ଗୁରୁ 120, ନଡିଆ ଗୋଟା 30ରୁ 35 ଟଙ୍କା ରହିଛି । ମହଙ୍ଗା ମାଡ ଭିତରେ ବି ସାବିତ୍ରୀଙ୍କ ପାଇଁ ସତ୍ୟବାନ ଭଳି କି ଭଳି ଫଳ କିଣିଛନ୍ତି ।