ପୁଣି ଘଟିଲା ହତ୍ୟାକାଣ୍ଡ, ଭାଇର ଟାଙ୍ଗିଆ ଚୋଟରେ ଭାଇ ମୃତ

ଥମିବାର ନା ଧରୁନି ଅପରାଧିକ ମାମଲା । ସମ୍ପର୍କୀୟ ଭାଇର ଟାଙ୍ଗିଆ ଚୋଟରେ ଭାଇର ମୃତ୍ୟୁ । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଅଭିଯୁକ୍ତ ଫେରାର। ଅଧିକ ପଢନ୍ତୁ...

ବୌଦ୍ଧ: ଗୋଟିଏ ପରେ ଗୋଟିଏ ଅପରାଧିକ ମାମଲା ପୋଲିସର ମୁଣ୍ଡ ବ୍ୟଥାର କାରଣ ପାଲଟିଛି । ବୁଧବାର ବହୁ ଚର୍ଚ୍ଚିତ ଅଗସ୍ତି ମହାକୁଳ ହତ୍ୟାକାଣ୍ଡ ସହ ଜଡିତ ତିନିଜଣ ଅଭିଯୁକ୍ତଙ୍କୁ ପୋଲିସ ଗିରଫ କରି କୋର୍ଟ ଚାଲାଣର ଚବିଶ ଘଣ୍ଟା ନପୁରୁଣୁ ପୁଣି ଘଟିଛି ଆଉ ଏକ ହତ୍ୟାକାଣ୍ଡ ।

ବୌଦ୍ଧ ଥାନା ଅନ୍ତର୍ଗତ ମୁଣ୍ଡାପଡା ପଞ୍ଚାୟତ କିରାସିରା ଗ୍ରାମରେ ସମ୍ପର୍କୀୟ ଭାଇ ଭାଇକୁ ଟାଙ୍ଗିଆରେ ହାଣି ବିଭତ୍ସ ଭାବରେ ହତ୍ୟା କରିଛି । ଏକ ପୂର୍ବ ଶତୃତା କୁନେଇ ଅଭିଯୁକ୍ତ ନିଜ କାକା ପୁଅ ଭାଇ ନିରଞ୍ଜନକୁ ଟାଙ୍ଗିଆ ରେ ଚୋଟ ଉପରେ ଚୋଟ ମାରି ହତ୍ୟା କରିଛି ।

ଏହି ହତ୍ୟାରେ ଅଭିଯୁକ୍ତର ବାପା ମା’ ମଧ୍ୟ ସହଯୋଗ କରିଥିବା ମୃତକଙ୍କ ଭାଇ ଅଭିଯୋଗ କରିଛନ୍ତି। ଘଟଣା ସ୍ଥଳରୁ ଅଭିଯୁକ୍ତ ଟାଙ୍ଗିଆ ସହିତ ଫେରାର ହୋଇ ଯାଇଥିବା ବେଳେ ବୌଦ୍ଧ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।

ହତ୍ୟାକାଣ୍ଡରେ ସହଯୋଗ କରିଥିବା ଅଭିଯୁକ୍ତର ପିତାମାତାକୁ ପୋଲିସ ଅଟକ ରଖି ପଚରାଉଚରା କରୁଛି। ସେପଟେ ଚଣ୍ଡିଗଡ ଓ ଟିକରପଡା ଅଞ୍ଚଳରେ ଦୁଇଟି ସଡକ ଦୁର୍ଘଟଣାରେ ଦୁଇ ଜଣ ଗୁରୁତର ଆହତ ହୋଇଥିବା ଜଣାପଡିଛି ।

ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ