ଖୋର୍ଦ୍ଧା: ବେଗୁନିଆ ଥାନା ପୋଲିସ ପକ୍ଷରୁ ଆଜି (ଗୁରୁବାର) ଏକଡାଳିଆ କାଜୁ ଜଙ୍ଗଲରେ ଚଢ଼ାଉ କରି ବିପୁଳ ପରିମାଣର ପୋଚ ନଷ୍ଟ କରିବା ସହ ମଦରନ୍ଧା ସାମଗ୍ରୀ ଜବତ କରିଛି । ସୂଚନାମୁତାବକ, ଏକଡାଳିଆ କାଜୁ ଜଙ୍ଗଲରେ ବହୁ ଦିନ ହେବ ଦେଶୀମଦ କାରବାର ହେଉଥିଲା ।
ତେବେ ଆଜି ବିଶେଷସୂତ୍ରରୁ ଖବର ପାଇ ବେଗୁନିଆ ଥାନା ଅଧିକାରୀ ରଶ୍ମି ରଞ୍ଜନ ସାହୁଙ୍କ ନେତୃତ୍ୱରେ ଏକ ପୋଲିସ ଟିମ ଏକଡାଳିଆ କାଜୁ ଜଙ୍ଗଲରେ ମିଳିତ ଚଢାଉ କରିଥିଲେ । ଚଢାଉ ବେଳେ ମଦ ବ୍ୟବସାୟୀ ମାନେ ଫେରାର ହୋଇଯାଇଥିବା ବେଳେ ମଦ ରନ୍ଧା ପାଇଁ ବ୍ୟବହୃତ ସାମଗ୍ରୀ ଏବଂ ୩ ହଜାର ଲିଟରରୁ ଉର୍ଦ୍ଧ୍ବ ପୋଚକୁ ନଷ୍ଟ କରାଯାଇଛି । ନଷ୍ଟ କରାଯାଇଥିବା ପୋଚ ସହ ଜବତ ମଦ ତିଆରି ସାମଗ୍ରୀର ମୂଲ୍ୟ ଲକ୍ଷାଧିକ ଟଙ୍କାରୁ ଉର୍ଦ୍ଧ୍ବ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ