ଜଳିଗଲା ଭେଣ୍ଡିଙ୍ଗ ଜୋନ୍, ଲକ୍ଷାଧିକ ଟଙ୍କାର ସମ୍ପତ୍ତି ଭସ୍ମ

ନିଆଁର ଲେଲିହାନ ଶିଖାରେ ୪ଟି ଦୋକାନର ଲକ୍ଷାଧିକ ଟଙ୍କାର ସାମଗ୍ରୀ ଜଳିପୋଡି ପାଉଁଶ ହୋଇଯାଇଛି । ତେବେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିବାରେ ବିଳମ୍ବ କରିବାରୁ ଦୀର୍ଘ ଦେଢ଼ ଘଣ୍ଟା ଧରି ନିଆଁ ହୁତୁ ହୁତୁ ହୋଇ ଜଳିଥିଲା

ଭୁବନେଶ୍ୱର: ସ୍ଥାନୀୟ ସିଆରପି ଛକ ସ୍ଥିତ ଭେଣ୍ଡିଙ୍ଗ୍ ଜୋନରେ ବୁଧବାର ମଧ୍ୟାହ୍ନରେ ଭୟାବହ ଅଗ୍ନିକାଣ୍ଡ । ନିଆଁର ଲେଲିହାନ ଶିଖାରେ ୪ଟି ଦୋକାନର ଲକ୍ଷାଧିକ ଟଙ୍କାର ସାମଗ୍ରୀ ଜଳିପୋଡି ପାଉଁଶ ହୋଇଯାଇଛି । ତେବେ ଦମକଳ ବାହିନୀ ଘଟଣାସ୍ଥଳରେ ପହଞ୍ଚିବାରେ ବିଳମ୍ବ କରିବାରୁ ଦୀର୍ଘ ଦେଢ଼ ଘଣ୍ଟା ଧରି ନିଆଁ ହୁତୁ ହୁତୁ ହୋଇ ଜଳିଥିଲା ।

ପ୍ରଫୁଲ୍ଲ ମହାନ୍ତିଙ୍କ ଫଳ ଦୋକାନରେ ନିଆଁ ଲାଗିବା ପରେ ଆଖିପିଛୁଳାକେ ଅନ୍ୟ ୩ଟି ଦୋକାନକୁ ନିଆଁ ବ୍ୟାପିଥିଲା । ତେବେ ଦୋକାନ ଘର ଉପରେ ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ କେବୁଲ୍ ଯାଇଥିବାରୁ ଉପସ୍ଥିତ ଲୋକେ ନିଆଁ ଲିଭାଇବା ପାଇଁ ସାହସ ଜୁଟାଇ ପାରିନଥିଲେ । ଅନ୍ୟପଟେ ପଛରେ ଥିବା ଏକ ଘରୋଇ ସ୍କୁଲ ପଟୁ ନିଆଁ ଲାଗିଥିବା ସନ୍ଦେହ କରାଯାଉଛି ।

ଅଗ୍ନିକାଣ୍ଡରେ କ୍ଷତିଗ୍ରସ୍ତ ହୋଇଥିବା ଦୋକାନୀ ହେଲେ- ପ୍ରତାପ ବେହେରା (ଫଳ ଦୋକାନୀ), ପ୍ରଫୁଲ୍ଲ ଚନ୍ଦ୍ର ମହାନ୍ତି (ଫଳ ଦୋକାନ), ମିଥୁନ ବେହେରା (ଫଳ ଦୋକାନ) ଏବଂ ସନ୍ତୋଷ ପ୍ରଧାନ (ପାନ ଦୋକାନ) । ସୂଚନା ମୁତାବକ, ପ୍ରଫୁଲ୍ଲ ମହାନ୍ତିଙ୍କ ଦୋକାନରେ ନିଜ ପୁଅର +୨ ବହି ଖାତା ସହ ଗୁରୁତ୍ବପୂର୍ଣ୍ଣ କାଗଜ ପତ୍ର ପୋଡି ପାଉଁଶ ହୋଇଯାଇଛି । ପରେ ୨ଟି ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲା ।

ଭୁବନେଶ୍ବରରୁ ବିକାଶ ଦାଶ, ଇଟିଭି ଭାରତ