ଭୁବନେଶ୍ବର:ସମ୍ବଲପୁରର କୁଳପତି ଭାବରେ ନିଯୁକ୍ତି ହେଲେ ପ୍ରଫେସର ବିଧୁ ଭୂଷଣ ମିଶ୍ର । ତେବେ ରାଜ୍ୟପାଳ ତଥା ବିଶ୍ୱବିଦ୍ୟାଳୟର କୁଳପତି ପ୍ରଫେସର ଗଣେଶୀ ଲାଲ 4 ବର୍ଷ ପାଇଁ ସମ୍ବଲପୁରର କୁଳପତି ଭାବେ ପ୍ରଫେସର ମିଶ୍ର ନିଯୁକ୍ତି କରିଛନ୍ତି। ପ୍ରଫେସର ବିଧୁ ଭୂଷଣ ଉତ୍କଳ ବିଶ୍ୱବିଦ୍ୟାଳୟରେ ବାଣିଜ୍ୟ ବିଭାଗର ପ୍ରଫେସର ଭାବରେ ଅବସର ନେଇଛନ୍ତି । ସେ 9ଟି ପୁସ୍ତକ ରଚନା କରିବା ସହ ଲୋକପ୍ରିୟ ପତ୍ରିକାରେ 122ଟି ଲେଖା ଲେଖିଛନ୍ତି । ତାଙ୍କର 34 ବର୍ଷରୁ ଅଧିକ ସମୟର ଶିକ୍ଷାଦାନ ଅଭିଜ୍ଞତା ରହିଛି । ଏହାଛଡ଼ା ସେ ସଫଳତାର ସହିତ 39 ଜଣ PHd ଓ 3 ଜଣ M.Phil ସ୍କଲାରଙ୍କୁ ଗାଇଡ୍ କରିଛନ୍ତି ।
ସୂଚନା ଅନୁଯାୟୀ, ବିବାଦ ଘେରରେ ଛନ୍ଦି ହୋଇ ଇସ୍ତଫା ଦେଇଥିବା ସମ୍ବଲପୁର ବିଶ୍ୱବିଦ୍ୟାଳୟ କୁଳପତି ପ୍ରଫେସର ସଞ୍ଜୀବ ମିତ୍ତଲଙ୍କ ପରେ ଏବେ ନୂତନ କୁଳପତି ନିଯୁକ୍ତ ହୋଇଛନ୍ତି । ପ୍ରଫେସର ସଞ୍ଜୀବ ମିତ୍ତଲ ସମ୍ବଲପୁର ବିଶ୍ୱବିଦ୍ୟାଳୟର କୁଳପତି ଭାବେ ଯୋଗ ଦେବା ଦିନଠାରୁ ବିବାଦ ଘେରରେ ଛନ୍ଦି ହୋଇ ଆସୁଥିଲେ । ସ୍ୱଚ୍ଛ ବିଦ୍ୟାଳୟ ଅଭିଯାନ ପ୍ରକଳ୍ପ ପାଇଁ ଦିଆଯାଇଥିବା 33 ଲକ୍ଷ 44 ହଜାର ଟଙ୍କା ମଧ୍ୟରୁ ପ୍ରଫେସର ମିତ୍ତଲ 29 ଲକ୍ଷ ଟଙ୍କା ତାଙ୍କ ନିକଟ ସମ୍ପର୍କୀୟଙ୍କୁ ପଠାଇ ସେ ନିଜ ପାଇଁ ବଡ଼ ବିପଦ ଟାଣି ଆଣିଥିଲେ । ପ୍ରଫେସର ମିତ୍ତଲ ନାନା ପ୍ରକାରର ବିବାଦରେ ଛନ୍ଦି ହୋଇ ଶେଷରେ ନିଜ ପଦବୀରୁ ଇସ୍ତଫା ଦେଇଥିଲେ ।