ଭୁବନେଶ୍ବର: ଓଡ଼ିଶା ପୋଲିସ ପ୍ରତିଷ୍ଠାକୁ ପୁରିଛି ୮୮ ବର୍ଷ । ଏହାରି ଭିତରେ ଆଧୁନିକ ଯୁଗ ଆଡ଼କୁ ଅଗ୍ରସର ହୋଇଛି ବିଭାଗ । ବିଭାଗରେ ଆସିଛି ଅନେକ ପରିବର୍ତ୍ତନ । ବଦଳିଛନ୍ତି ଅନେକ ମୁଖିଆ ବା ପୋଲିସ ମହାନିର୍ଦ୍ଦେଶକ । ଯୋଗଦେଇଛନ୍ତି ନୂଆ ନୂଆ ଡାଇନାମିକ ଅଫିସର ଓ କର୍ମଚାରୀ । ଏହାରି ଭିତରେ ପୋଲିସ କେତେବେଳେ ସୁନାମ ଆଣିଥିବା ବେଳେ କେତେବେଳେ ବଦନାମ ମଧ୍ୟ ହେଉଛି । ହେଲେ ବାସ୍ତବିକ ଲୋକଙ୍କ ସେବାରେ ନିଜର କର୍ତ୍ତବ୍ୟ ନିଷ୍ଠାକୁ ଏକ କରି ଉତ୍ତମ ସେବା ଯୋଗାଇଥିବା କର୍ମଚାରୀଙ୍କୁ ଆଜି ମିଳିଛି ସମ୍ମାନ । ବିଭାଗର ମୁଖିଆ ତଥା ପୋଲିସ ମହାନିର୍ଦ୍ଦେଶକ ସୁନୀଲ ବଂଶଲ ବିଭାଗର ୧୦୦ ଜଣ କର୍ମଚାରୀଙ୍କୁ ଦେଇଛନ୍ତି ଡିଜି ଡିସ୍କ ସମ୍ମାନ ।
୫ ଜଣ ଏସ୍ପିଙ୍କ ସମେତ ଅନେକ ଏସିପି, ଡିଏସ୍ପି, ଇନ୍ସ୍ପେକ୍ଟର, ଏସ୍ଆଇ, ଏଏସ୍ଆଇ, କନ୍ଷ୍ଟେବଳ, କମାଣ୍ଡାଣ୍ଟ ଓ ହାବିଲଦାର ଏହି ସମ୍ମାନ ପାଇଛନ୍ତି । ଯେଉଁମାନେ ନିଜ କ୍ୟାରିଅରରେ କଳଙ୍କର ଦାଗ ନଲଗାଇ ଲୋକଙ୍କ ସେବା ପାଇଁ ପୋଲିସ ବିଭାଗ ସହ ଜଡ଼ିତ ହୋଇ ନିଜର ଉତ୍ତମ କର୍ତ୍ତବ୍ୟ ପାଳନ କରିଛନ୍ତି । ସିନିଅର୍ ବା ସୁପରିୟରଙ୍କ ସୁପାରିଶ କ୍ରମେ ବିଭାଗର ମନୋବଳ ବଢାଇବା ପାଇଁ ଏହି ସମ୍ମାନ ପ୍ରଦାନ କରାଯାଇଛି । ଏନେଇ ପୋଲିସ ସେବା ଭବନରେ ସ୍ବତନ୍ତ୍ର କାର୍ଯକ୍ରମ ଅବସରରେ ପୋଲିସ ବିଭାଗର ବହୁ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏହି ସମ୍ମାନ ପ୍ରଦାନ କରିଛନ୍ତି ପୋଲିସ ମହାନିର୍ଦ୍ଦେଶକ ସୁନୀଲ ବଂଶଲ । ଏହା ସହିତ ଆଗାମୀ ଦିନରେ ପୂର୍ବଭଳି ଭଲ କାମ କରିବା ସହ ଲୋକଙ୍କ ସେବାରେ ନିଜକୁ ଉତ୍ସର୍ଗୀକୃତ କରିବେ ସେ ନେଇ ଡିଜିପି ଆହ୍ବାନ ଦେଇଛନ୍ତି ।