ଭୁବନେଶ୍ବର: ଦ୍ବାଦଶ ଶ୍ରେଣୀ ଛାତ୍ରୀଙ୍କ ଅଭିନବ ପ୍ରୟାସ । ମାଆଙ୍କ ପାଇଁ ତିଆରି କଲେ ସ୍ବତନ୍ତ୍ର ଆପ୍ । ତାଙ୍କ ମାଆ ହେଉଛନ୍ତି ଜଣେ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି) ସଦସ୍ୟ। । ତାଙ୍କୁ ସ୍କୁଲରେ ଦିଆଯାଉଥିବା ମଧ୍ୟାହ୍ନ ଭୋଜନର ହିସାବ ରଖିବାକୁ ପଡ଼େ । ହେଲେ ଅନେକ ସମୟରେ ଏହି ହିସାବ କିତାବରେ ଭୁଲ ହେଉଥିବାରୁ ଏଭଳି ସମସ୍ୟାକୁ ଦୃଷ୍ଟିରେ ରଖି ଛାତ୍ରୀ ଜଣକ ସମସ୍ତ ଏସଏଚଜି ମହିଳାଙ୍କ ପାଇଁ ଏକ ଆପ୍ ପ୍ରସ୍ତୁତ କରିଛନ୍ତି, ଯାହାର ନାମ ରହିଛି 'ସାଥୀ' । ଏହି ଛାତ୍ରୀ ହେଉଛନ୍ତି ରାୟଗଡ଼ା ଆଦର୍ଶ ବିଦ୍ୟାଳୟର ପାୟଲ ପ୍ରଧାନ ।
ଏନେଇ ପାୟଲ କହିଛନ୍ତି ଯେ, ସୁରଭି ୨୦୨୩ କାର୍ଯ୍ୟକ୍ରମରେ ସେ ଏକ ଆପ୍ ବିକଶିତ କରିଛନ୍ତି । ଯାହାର ନାମ ସାଥୀ ଆପ୍ । ଏହି ଆପ୍ ଜରିଆରେ ସେ ଏସ୍ଏଚ୍ଜି ଗ୍ରୁପ୍ ମହିଳାମାନଙ୍କ ସମସ୍ୟା ସମାଧାନ କରିବାକୁ ଚେଷ୍ଟା କରିଛନ୍ତି । ସ୍କୁଲ୍ରେ ମଧ୍ୟାହ୍ନ ଭୋଜନର ବ୍ୟବସ୍ଥା ଏସ୍ଏଚ୍ଜି ସଦସ୍ୟମାନେ ବୁଝୁଛନ୍ତି । ଏଥିପାଇଁ ମଧ୍ୟାହ୍ନ ଭୋଜନର ଟିକନିକ୍ ହିସାବ ରଖିବାକୁ ପଡ଼ୁଛି । କିନ୍ତୁ ଏସ୍ଏଚ୍ଜି ସଦସ୍ୟମାନେ ଏତେ ଶିକ୍ଷିତ ହୋଇନଥିବାରୁ ଅନେକ ସମୟରେ ହିସାବରେ ଗଡ଼ବଡ଼ି ଦେଖାଯାଉଛି ନଚେତ୍ ସେମାନଙ୍କୁ ଅନ୍ୟର ସାହାଯ୍ୟ ନେବାକୁ ପଡୁଛି । ମାତ୍ର ଏହି ସାଥୀ ଆପ୍ ଦ୍ଵାରା ସେମାନେ ସୁବିଧାରେ ହିସାବ ରଖିପାରିବେ । ଏସ୍ଏଚ୍ଜି ସଦସ୍ୟମାନେ ନିଜ କାମ ନିଜେ କରିପାରିବେ ।