ଖୋର୍ଦ୍ଧା:ଡକାୟତି ବେଳେ ଲୋକଙ୍କ ହାତରେ ଧରାପଡିଲେ ଲୁଟେରା । ଲୁଟେରାଙ୍କୁ ଧରି ବହେ ଉତ୍ତମ ମଧ୍ୟମ ଦେଲେ ସ୍ଥାନୀୟ ଲୋକେ । ଖୋର୍ଦ୍ଧା ୧୬ନଂ ଜାତୀୟ ରାଜପଥ ବାଲୁଗାଁ ସରନଇ ବାଇପାସ ନିକଟରୁ ଏହି ଘଟଣା ସାମ୍ନାକୁ ଆସିଛି । କିଛି ଦୁର୍ବୃତ୍ତ ପୂଜା ଚାନ୍ଦା ଆଦାୟ ନାଁରେ ଟ୍ରକ ଡ୍ରାଇଭର ଠାରୁ ଲୁଟ୍ କରିବାକୁ ଉଦ୍ୟମ କରୁଥିବାବେଳେ ଧରା ପଡିଛନ୍ତି ।
ସୂଚନା ଅନୁସାରେ, ଜଣେ ଡ୍ରାଇଭର ଭାରତ ପେଟ୍ରୋଲ ଟ୍ୟାଙ୍କର ଟ୍ରକ ନେଇ କଟକ ଜିଲ୍ଲାରୁ ଗଞ୍ଜାମ ଅଭିମୁଖେ ଯାଉଥିଲା । ଏହି ସମୟରେ ଚାରି ଜଣ ଦୁର୍ବୃତ୍ତ ଗଣେଶ ପୂଜା ଚାନ୍ଦା ମାଗିବା ଉଦ୍ଦେଶ୍ୟରେ ଟ୍ରକଟିକୁ ଅଟକାଇ ଥିଲେ । ଏହାପରେ ଡ୍ରାଇଭରକୁ ପାଣି ପିଇବା ପାଇଁ ମାଗି ତାଙ୍କ ଉପରେ ତୁରନ୍ତ ଆକ୍ରମଣ କରିଥିଲେ । ଠିକ ଏହି ସମୟରେ ସ୍ଥାନୀୟ ଲୋକମାନଙ୍କ ନଜର ପଡ଼ିଥିଲା ଲୁଟେରାଙ୍କ ଉପରେ । ତୁରନ୍ତ ଲୁଟେରାମାନଙ୍କୁ କାବୁ କରିବା ପାଇଁ ଲୋକମାନେ ଗୋଡେଇ ଥିଲେ । ହେଲେ ସେମାନଙ୍କ ମଧ୍ୟରୁ ଦୁଇ ଜଣ ଲୁଟେରା ଧରାପଡିଥିବା ବେଳେ ଅନ୍ୟ ଦୁଇ ଜଣ ଫେରାର ହୋଇଯାଇଥିଲେ । ଦୁଇ ଲୁଟେରାଙ୍କୁ ଧରି ଲୋକମାନେ ଉତ୍ତମ ମଧ୍ୟମ ଦେବା ସହ ବାଲୁଗାଁ ପୋଲିସକୁ ଖବର ଦେଇଥିଲେ । ବାଲୁଗାଁ ପୋଲିସ ଓ ନାଭାଲ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ଦୁଇ ଜଣ ଲୁଟେରାଙ୍କୁ ଥାନାକୁ ନେଇ ଅଟକ ରଖିଥିବା ଜଣାପଡିଛି ।