ଭୁବନେଶ୍ବର: ରାଜ୍ୟରେ ଇ-ଯାନ କିଣିବାକୁ ଲୋକଙ୍କ ମଧ୍ୟରେ ଆଗ୍ରହ ବଢିବାରେ ଲାଗିଛି । ଚଳିତ ବର୍ଷ ଦୁଇ ଚକିଆରୁ ଆରମ୍ଭ କରି ଚାରି ଚକିଆ ପର୍ଯ୍ୟନ୍ତ ରେକର୍ଡ ସଂଖ୍ୟକ ଇ-ଯାନ ବିକ୍ରି ହୋଇଛି । ଏନେଇ ବିଧାନସଭାରେ ଉତ୍ତର ରଖିଛନ୍ତି ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁ ।
କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତିଙ୍କ ପ୍ରଶ୍ନର ଉତ୍ତରରେ ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁ କହିଛନ୍ତି , "ବର୍ତ୍ତମାନ ସୁଦ୍ଧା ରାଜ୍ୟରେ ୩୦,୩୩୬ଟି ଦୁଇ ଚକିଆ ଇ-ଯାନ ବିକ୍ରି ହୋଇଛି । ସେହିପରି ୩୫୮୦ଟି ତିନି ଚକିଆ ଓ ୪୫୪ ଟି ଚାରିଚକିଆ ଇ-ଯାନ ବିକ୍ରି ହୋଇଛି । କେବଳ ଚଳିତବର୍ଷରେ ୨୨,୭୪୫ ଟି ଦୁଇ ଚକିଆ ଇ-ଯାନ ବିକ୍ରି ହୋଇଛି । ୨୦୧୬ରେ ରାଜ୍ୟରେ ମାତ୍ର ୨୩ଟି ଏହି ଧରଣର ଯାନ ବିକ୍ରି ହୋଇଥିଲା ।"