ଖୋର୍ଦ୍ଧା:ମୋବାଇଲ ଫାଇନାନ୍ସ କରେଇ ଦେବାକୁ କହି ବଡଧରଣର ଠକେଇ । ୩ଟି ମୋବାଇଲ ଦୋକାନରୁ ଫୋନ ଫାଇନାନ୍ସ କରେଇବା ଦେବା ନାଁରେ ଠକିନେଲେ କୋଟିଏରୁ ଊର୍ଦ୍ଧ୍ବ ଟଙ୍କା । ଏଭଳି ବଡ ଧରଣର ଠକେଇର ଅଭିଯୋଗ ଆସିଛି ଖୋର୍ଦ୍ଧା ସହରରେ ଥିବା ଓଁମା କମୁନିକେସନର 3ଟି ଦୋକାନ ନାଁରେ । ଏହି ଘଟଣାରେ ୨ଜଣକୁ ଅଟକ ରଖି ତଦନ୍ତ ଚଳାଇଛି ପୋଲିସ ।
ସୂଚନାଅନୁସାରେ, ମାସେ ପୂର୍ବରୁ ଲୋନ କରେଇବା ନାଁରେ କର୍ମଚାରୀମାନଙ୍କ ମାଧ୍ୟମରେ କାଗଜପତ୍ର ସଂଗ୍ରହ କରି ମୋବାଇଲ ବଦଳରେ ଫୋନ ଖୋଳ ଦେଇ ଟଙ୍କା ନେଇ ଛୁ ମାରିଥିଲେ ମୋବାଇଲ ଦୋକାନୀ ମାଲିକ । ୫୦ରୁ ଊର୍ଦ୍ଧ୍ବ ଲୋକଙ୍କ ଠାରୁ ଏଭଳି ଠକେଇ ହୋଇଥିବା ନେଇ ଅଭିଯୋଗ ହୋଇଛି । ଉକ୍ତ ଲୋନ ଅର୍ଥ ଆକାଉଣ୍ଟକୁ ପଠାଯିବ କହି ମୋବାଇଲ ଦୋକାନୀ ଆଉ ଧରାଛୁଆଁ ଦେଲେନାହିଁ । କିନ୍ତୁ ସେପଟେ ମାସକୁ ଲୋନ କିସ୍ତି ଭରିବାକୁ ବ୍ୟାଙ୍କରୁ କଲ ଓ ମେସେଜ ଆସିବା ପରେ ଠକେଇର ଶିକାର ହୋଇଥିବା ଜାଣିପାରି ଖୋର୍ଦ୍ଧା ଆଦର୍ଶ ଥାନାର ଦ୍ୱାରସ୍ଥ ହୋଇଛି ପ୍ରାୟ ୫୦ରୁ ଉର୍ଦ୍ଧ୍ବ ଲୋକ । ସେପଟେ ଘଟଣା ଜଣାପଡିବା ପରେ ମୋବାଇଲ ଦୋକାନୀ ଫେରାରଥିବା ବେଳେ ଘଟଣାର ତଦନ୍ତ ଜାରି ରଖିଛି ଆଦର୍ଶ ଥାନା ପୋଲିସ ।
ଇଟିଭି ଭାରତ, ଖୋର୍ଦ୍ଧା
